Pǝ̂rǝ ma ! Arà !
Ampǝrǝ n ce wuuu atɩ ri ʊsoro ashɛɛrɛ ɖǝn n'akar. Ʊpi aɖɔŋkɔnɔ na ba wʊɖa. Áŋyɩ̀ɖa n jɩ ka wàà, Nuuratu. Nuuratu ayar n'anar ba sɔlɔ nɩ páá.

Ʊshilé ɖǝn na ayar, n'anar ba tɔɔ niya wàà, a cê 'ʊfà atanja ba na yɩɖa wàà, Naajimu ma, sul. Na Nuuratu anar a pɔɔ tobi asoŋsono nɖee laŋ a para yeeyee ma, ashee nɩ. N'a shee nɩ ʊɖɔ nɩ kagɩshipi gɩsoŋsono gboo naa alǝ nɩ wàà, a cê 'ʊfà ɖe agapapiri nɩ.

A na ce ma, n'a kpa gatujala gaɖǝn sul. N'a lo atala aɖǝ na gatujala gaɖe. A ɖǝ boŋo ma, n'a wa na gapisǝmpi gaɖǝn gaɖe ga kara ŋkɩsa katoko.

Na ga taba Nuuratu wàà : « Ŋka na ʊ na ce ? » Na Nuuratu a buye nɩ wàà : « N tɩ ce ma tɩ jêɖe amʊfà Naajimu. » Na gapisǝmpi ga lǝ nɩ wàà : « Ɩɩŋ, ɩ cǝm. Naajimu amʊfà na a lee gboo. N na ce ma tɩ jêɖe nɩ gǝŋ gboo. » Na ba tɔɔ ʊnyɩŋca aman asara babɛrɛ banyɩʊ.

Naa ba ye kpa ɖooɖoo, na gapisǝmpi ga lǝ Nuuratu wàà : « Akatobi n'akɩshipi ɖe ɩ cǝm páá. Jɩ̂ suuru, shêe amʊ ma kâra aŋǝ. » Na Nuuratu a laa atobi n''ɩshipi naa ashee gapisǝmpi gaɖe.

Tam nɖee gapisǝmpi ga laa kaŋkɩsa katoko na yɛɛ ga fʊ̂ba kayɔkɔ naa akara Nuuratu ɩjà ma, na Nuuratu a ŋǝ wàà, ga wʊɖa gɩshelu. N'asampǝna ɩ kpa nɩ. N'ɩ ye nɩ ʊpi gʊsʊ̀rá ŋgʊɖee gapisǝmpi gaɖe ga lee ma. Ga lee limbuluu ɖǝn na.

Bagɩkrǝ nɩ, nnyanawili ayɔɩ nɖee n ɖoo arɛ̀ naa awʊɖa gɩshelu gɩlamaka ma, na ba na yɩɖa wàà, limbuluu.

Na ba man asara. Ba na ce ma, na Nuuratu a lǝ limbuluu wàà : « Jî suuru, shêe amʊ amatobi n'amɩshipi. » Na limbuluu a buye nɩ wàà : « Pâla ma kâra ɩ halɩ gɩ kpâ gʊyo ŋgʊɖe sul. » N'a faŋa nɩ gʊyo gʊɖǝn gabʊnɩ̀ laŋ.

Ba kpa gʊyo gʊɖe sul ma, na Nuuratu a lǝ limbuluu wàà : « Jɩ̂ suuru, shêe amʊ amatobi n'amɩshipi. » Na limbuluu a buye nɩ wàà : « Pâla amʊ ma kâra ɩ halɩ gɩ kpâ ʊtucine ʊfɔlɩ sul. » Asampǝna ɩɖe tɩ kpa Nuuratu, n'a tǝlǝ.

Ba kpa ʊtucine ɖe sul ma, na Nuuratu a kɔɔ lǝ limbuluu wàà : « Jɩ̂ suuru, shêe amʊ amatobi n'amɩshipi. » Na limbuluu a buye nɩ wàà : « Pâla ma kâra ɩ halɩ gɩ kpâ gapapiri ŋgaɖee nɩ basǝmprǝ ba sǝ wáá ma. » Na ba tǝwǝ gasana.

Ba kpa gapapiri nɩ ma, na limbuluu a pǝkil Nuuratu akɔɔ na ŋkǝm naa ayɩɖa basǝmprǝ mbaɖee ba sǝ asǝla na ŋku ma, naa alǝ pɩ wàà : « Ŋǝ̂ ma gapisǝmpi ŋgaɖee ga kara ŋkɩsa katoko wáá ma, ga kʊn amʊ na na pɩ ɖoo gajaka. N tɩ yɛɛ wàà, ga shɛ̂ʊ. » Ɩcifala n'asampǝna ɩ ta kpa Nuuratu halɩ a cu aforo.

Na limbuluu a kpa ʊfà Naajimu agafala nɩ, naa alǝ shɛlɛm wàà : « Amʊ na akaɖɔmpǝla Nuuratu. Amawɛɛ n'amaŋana ba tǝm ka amʊ wàà, ma pɩ̂ atɩ ɖa akasul. » Na Naajimu a cam nɩ gɩsaná. Aɖe n'abʊŋʊma ba ta toŋo limbuluu gɩshɛbʊ.

Ama Nuuratu a ta ɖa ɩshɛɩ, aɖʊwaa a na fol aka na, naa naa jɩ ʊjɩʊ gʊnyanʊ gʊɖɔŋkɔnɔ nɩ, aɖe n'ɩsna.

Ʊshilé baa ʊpaŋa na, Nuuratu aɖe tɩ ce bʊcafʊnwara nɩ na yɩɖa atulo : « Aʊʊʊʊ ! N ɖa ɩshɛɩ, n ɖa ɩshɛɩ ! Amawɛɛ n'amaŋana ba cee tǝm amʊ na amʊfà Naajimu sul. N'ʊnyɩŋca laŋ n wa na limbuluu ɖǝn n'a cam n'amʊ amatobi n'amɩshipi. Aʊʊʊʊ, n ɖa ɩshɛɩ, n ɖa ɩshɛɩ ! »

Ʊshilé ɖǝn na Naajimu apar ɖǝn a ɖa na yeeyee bʊwara nɩ ma, n'a rǝŋǝ biti kantulo nsoŋsono nɖǝn. Ama k'a yɔ arɛ̀ nɖee a na yɩɖa njɩ ma na. A kpa afal ma, n'a tɔɔ atam ashee Naajimu. Ŋkǝŋ na Naajimu a ce bʊwara bʊɖe nɩ gboo. A kpa ma, n'a rǝŋǝ ntulo nɖe naa ayɛɛ halɩ atɩ ŋǝ Nuuratu.

Na Nuuratu a tam ɖaa gasana ga sara ma, na ɖaa limbuluu a cam n'aɖe aɖe 'ayɔkɔkaraka ɩsoŋsono ma. Na Naajimu a ce na nɩ agaɖufal naa alugo nɩ aŋku nɩ. Naajimu aɖe yɔ bʊkɔ́ɩ a lêe naa a rî limbuluu ma.

A cee rǝŋǝ wàà, limbuluu agɩshelu gɩ sɔlɔ bʊnanye, gǝŋci ka gɩ sǝ̂ra afǝl asǝla bʊnanye naa gɩ pàá nyêm bʊ na. N'a lǝ bayifala wàà, ba kô gʊkulu gʊbʊmbɔnɔ ŋgʊɖee gʊ loŋ ma, naa ba rŋǝ̂ kʊ na bʊnanye bʊfolka. N'a yɩɖa gapapiri gaɖe kabʊpisǝmpi bʊŋunii naa bʊ lêe ʊtaʊsǝla kacaacaa ɖǝn.

Na limbuluu a kpa biti. Ka sɔlɔ wàà, a sǝ̂la gʊkulu gʊbʊmbɔnɔ gʊɖe na. A yɔ wàà, agɩshelu gɩ ta ŋǝ̂ bʊnanye bʊfolka gɩ tɩ gɩ naa yɛɛ gɩ nyêm. N'a kpa ŋku nɩ naa akʊr agɩshelu apatǝr n'agʊlɔ kǝŋkǝŋkǝŋ naa akpa ʊtanʊ nɖee bʊpisǝmpi bʊ ɖʊ ma nɩ.

Bʊpisǝmpi bʊ ta na sǝla gʊkulu gʊbʊmbɔnɔ gʊɖe gɩɖǝnɖǝn. Limbuluu a lee ka aboŋoka nɖee a tâ asǝla ma. N'a yɛɛ wàà, aɖe a ta alaŋlaŋ naa asǝla gʊkulu, ama na agɩshelu gɩ kʊɖa naa abɔ nɩ ashɛʊ na gʊkulu nɩ naa amɩyɛ na nɩ bʊnanye bʊfolka bʊɖe nɩ.

Limbuluu a ɖa na cǝ ɩbobo na yɛɛ wàà, aɖe a ɖôo bʊnanye bʊfolka bʊɖe nɩ ma, na basoro ba yɛɛ afʊrʊkɔ arŋǝ gʊkulu gʊɖe afum nɩ. Limbuluu agaja ga bon. Na Nuuratu a sǝra aɖa fɛɛ naa alǝŋ 'ʊfà sul.

Ampǝrǝ kɩɩja na kɩsǝi nɩ gǝŋ.

Ce livre a été traduit et publié par l'équipe anii de LINGO-Bénin à Bassila avec l'appui de "Der Gute Topf für Benin e.V.". Pour plus d'informations sur le projet anii et d'autres publications en langue anii, contactez-nous :

www.revue-gugu.org

+229 01 66 66 11 11
Téléphone et WhatsApp

L'équipe anii salue l'équipe de AfricanStoryBook et les remercie pour leur générosité et pour la licence de CC BY.