Pǝ̂rǝ ma ! Arà !

Ampǝrǝ n ce wuu atɩ ri akʊná ɖǝn a ɖa gʊyo gʊbʊmbɔnɔ gʊɖǝn gʊ ɖa asǝla na gato gaɖǝn ma. Gatukǝltǝna gajala gaɖǝn gaɖe ga ɖa gatubʊmbɔnɔ kagɩcɩɩca. Àyó tuutuuma nɖee ɩ na ŋʊm ɩyupi ma, ɩɖe ta ŋkǝŋ.

Akʊná aɖe tɩ yɛɛ a kǝ̂m ɩyupi ɖe aŋǝ. N'a ŋǝ gʊtakǝwa gʊɖǝn gatunɔ na gatukǝltǝna kagɩcɩɩca. N'a lǝ wàà, aɖe a taa sǝ̂ra ata ajim gʊtakǝwa gʊɖe laŋ naa aɖe a sǝ̂ra akpa gatukǝltǝna laŋ.

N'a ta ajim gʊtakǝwa gʊɖe laŋ. N'a kɔɔ ta ajim naa akpa gatukǝltǝna laŋ. A kpa naa ajɩ ɩyupi ɖe halɩ akun naa ashɛʊ agaɖu. A ce gatukǝltǝna gaɖe laŋ akpalá tuutuuma.

Ayɩwa ɖǝn aɖe ɖa gatubʊmbɔnɔ nɩ n'akar. N'akar a lǝ nɩ wàà : « Aŋkul asɔlɔka, ɩ sim a cê atɩ bɔlɔ akʊʊlɔ gʊtakǝwa ŋgʊɖe laŋ, aɖʊwaa akɩmpǝu n wʊɖa gʊtakǝwa gʊɖe kakɔla. »

Ɩshilé ɩtʊrka kaŋkǝm, n'ayɩwa a ŋǝ akʊná a na ce gatukǝltǝna laŋ ma. Akʊná a fǝl boŋo ma, n'ayɩwa a boɖo gʊtakǝwa gʊɖe laŋ shɛlɛm naa abɔlɔ agʊlɔ na laakaarɩ, anɖi nɖe n ɖa bʊto nɩ.

Sáà nɖee akʊná a kun boŋo ma, n'a kpeɖe agʊlɔ na yɛɛ a shɛ̂ʊ agaɖu. Ama 'ɩnyine nɩ gʊtakǝwa gʊ kɔɔ fuu awu ɖaa gʊ cee ɖa ma, ŋkǝŋ na a na lǝ na kʊ wàà : « Amʊsoro gʊtakǝwa, ɩ ɖa ɖaa ʊ kɔɔ fuu ma aa ? Ʊ shɩ ɖa alaafɩya aa ? »

Ayɩwa a lee ajore ma, n'a faŋa wàà, gʊtakǝwa gʊ lee bʊlilǝkayar na. N'a buye akʊná wàà : « Ayɩwa abʊmbɔnɔ ɖǝn a ɖa ka amalaŋ, n'ɩ ɖa ɖaa n fu ma. »

N'akʊná a lǝ wàà : « Ayɩwa, n yɔ wàà, ʊ tɩ yɛɛ á tɔ̂ɔ amʊ apra n'akʊjɩʊ. N kpǝr gɩpǝla yɔgʊʊ, ʊ taa sǝ̂ra akur amʊ, ama ɩ sim ma lêe ambapi baabaɩ boŋo naɩ, gʊyo ŋgʊɖe laŋ. » Ŋkǝŋ na ayɩwa a taa akʊná agakǝma laŋ.

Ba kpa kpaarɩ ma, n'akʊná a boɖo gʊyo laŋ naa alǝ wàà : « Na ntǝma ashee gʊyeeyee, amʊsoro. Baabaɩ ! Nnyǝmǝ ʊ taa sǝ̂ra ashɛʊ akaaɖu. » N'ayɩwa a buye nɩ wàà : « Ama ʊ lee amʊ alkawɩlɩ... »

Akʊná a lɛʊ naa alǝ nɩ wàà : « Ʊ lee ajore ma, n'ʊ shee amʊ ɩjá. » N'a foro àyó kɩla nɩ. Ayɩwa k'a sǝra ari akʊná ayɔɩ ayɔ na !

Ampǝrǝ kɩɩja nɩ gǝŋ.

Ce livre a été traduit et publié par l'équipe anii de LINGO-Bénin à Bassila avec l'appui de "Der Gute Topf für Benin e.V.". Pour plus d'informations sur le projet anii et d'autres publications en langue anii, contactez-nous :

www.revue-gugu.org

+229 01 66 66 11 11
Téléphone et WhatsApp

L'équipe anii salue l'équipe de AfricanStoryBook et les remercie pour leur générosité et pour la licence de CC BY.