Document

Ʊbɔbɔʊ ashee ntǝma nɖee n lee kpatakɩɩ awu ma

Beatrice Inzikuru

Wiehan de Jager

Gapapiri gaɖǝn nɩ, bɛrɛ kǝ ba na rǝŋǝ na bawor ashee bantǝma afǝlǝfǝlǝ na. Baa arɛ̀ apaŋa na, aɖe a tɩ ŋǝ wàà, aɖe antǝma n lee ka kpatakɩɩ awu.

Afaŋaka ɖǝn a tɩ lǝ wàà, ba tǝ̂ŋǝ na aɖe antǝma, n lee ka kpatakɩɩ gapapiri nɩ awu. Na wàà : « Afaŋaka a ta mâna, sukuru k'a ɖa na. Sukuru a ta mâna, k'ɩɩ sǝra acerecere akoɖǝn na. »

Akucǝja a tɩ lǝ wàà, ba tǝ̂ŋǝ na aɖe antǝma, n lee ka kpatakɩɩ awu. Na wàà : « Akucǝja a ta mâna, sukuru kaku ɩ mana. Ŋka na ɩ naa cêrecere ? Ɩfala gboo k'ɩ ɖâ na. Ŋka na ɩ naa fôl ? »

Kaafɩnta a tɩ lǝ wàà, ba tǝ̂ŋǝ na aɖe antǝma, n lee ka kpatakɩɩ awu. Na wàà : « Kaafɩnta a ta mâna, aboí, ɩtebiri n'ɩkɔba k'ɩ ɖa ɩfala nɩ na sukuru nɩ gboo na. »

Logotoro a tɩ lǝ wàà, ba tǝ̂ŋǝ na aɖe antǝma, n lee ka kpatakɩɩ awu. Na wàà : « Logotoro a ta mâna, ʊshɛɖʊ ʊ tʊʊ sǝ̂ra ari anyɩn halɩ ɩ tɩ́ cî. »

Afʊmɩ a tɩ lǝ wàà, ba tǝ̂ŋǝ na aɖe antǝma, n lee ka kpatakɩɩ awu. Na wàà : « Afʊmɩ a ta mâna, k'ɩɩ naa ŋǝ̂ akoɖǝn na jɩ na. »

Sukuru kʊpi a tɩ lǝ wàà, ba tǝ̂ŋǝ na ntǝma nɖee sukuru kǝbapi ba na lee sukuru nɩ ma, n lee ka kpatakɩɩ awu. Na wàà : « Sukuru kʊpi a ta mâna, afaŋaka a mana, akucǝja a mana, logotoro a mana, afʊmɩ a mana, kaafɩnta gboo a mana. »

Ɩ tɩ lee tam ɖǝn nɩ ma, na baŋunii ba tǝlǝ na lǝ wàà, atǝma ɩŋunii ɩ lee kpatakɩɩ. Na wàà : « Gɩ tɩ hɩyɛŋ afaŋaka, akucǝja, logotoro, afʊmɩ na kaafɩnta. Ɩɖe ye saa wàà, shee baa aŋa na a lêe sukuru cei aboŋo naɩ. »

Ce livre a été traduit et publié par l'équipe anii de LINGO-Bénin à Bassila avec l'appui de "Der Gute Topf für Benin e.V.". Pour plus d'informations sur le projet anii et d'autres publications en langue anii, contactez-nous :

www.revue-gugu.org

+229 01 66 66 11 11
Téléphone et WhatsApp

L'équipe anii salue l'équipe de AfricanStoryBook et les remercie pour leur générosité et pour la licence de CC BY.

You are free to download, copy, translate or adapt this story and use the illustrations as long as you attribute in the following way:

Ʊbɔbɔʊ ashee ntǝma nɖee n lee kpatakɩɩ awu ma

Author - Beatrice Inzikuru
Adaptation - Abasse SOUMANOU BOUKARI
Illustration - Wiehan de Jager
Language - Anii
Level - Longer paragraphs