Ti wur po ha̧a̧, ti sir ma kuluu Johannesburg, may po kele hay biŋ we ni. Mayfur sen mba, hay diŋ ɗi.

Man ɓi raw kan ɗuu Miriam ne ɗi. Miriam Makeba.

Man ɓi hay diŋ Je saŋ gu, da wa̧a̧ge ga je pȩȩɗse ge, a maa a hay joŋ joŋre ma bag jag fȩȩre e ma yɔg tiŋre jar maa tikriŋ woo.

Man ɓi hay joŋ bon ma daꞌ sulay ka̧a̧ge ma wur ɓoꞌg ɓuy. A hay ti̧i̧ yeɗ yii liŋ maa daɗ sulay meꞌme.

Jag liŋgi maa ti sir hay riŋga yeɗge yii liŋ go diggi. Sodɛ raw ɓɔ man ɓi ti daŋgay ma few hiiraꞌ ha̧a̧.

Kiŋgi ɓi hay na new hwal ti nenmaꞌ tuu. Ndi hay de sa̧y ɓɛ. Kɔ ɓɛ de maaga ndi hay ɓɛ mayfur ɗa lay bolaa, ndi hay raw ti daŋgay lay.

Ɓarga, ndi hay daa ꞌwa siŋ. De maaga ndi gɛ̧ɛ̧go gom no, ndi jay man ɓi jɔg tiŋre.

Ndi hay ꞌwa siŋ de maaga ndi hay joŋ jonre mono, a hay joŋge nɛn po ga joŋre maa liŋ hay woo sɛ go gusgus e wùr hay ko woore na fooga buy. ꞌwage siŋ hay wóó me ge ga ŋgar dɛŋ wa̧a̧ɗge ɓɛ bay nɛn ɓi wa.

Ndi hay ꞌwa siŋ ti jag baa e se hay kol jar lan de wóóge lay. Jo̧o̧ de ka̧a̧ge maa tay jar lɛ.

De maa wûr hay ꞌwa siŋ mono, wûr hay koo se wûr de ɓoꞌ wuu de ȩgrɛ.

Jar hay wa̧a̧ wo ga gȩȩge ɓi hay man de kɔɗ e ga siŋre ɓiŋ woo hay go selaŋga.

Ndi hay ꞌwa siŋ de jar jo̧o̧re ma tikriŋ woo e a hay laa jo̧o̧ naa go ti ŋgel ɓuy.

Ndi hay naage Sophiatown, ŋgel maaga aa ꞌawa siŋ ni debaŋ. Sophiatown diŋ ŋgel maaga jar Afirik sud hay woo haɗ kaŋ siŋ ni de dagge jo̧o̧ jag do ka̧a̧ra.

A maa jar maaga hay wo wa̧a̧ sir ti taŋ sen hay bay woo daare kanpe sen wa. Jar kuluri maa wa̧a̧re sir hay bay woo de sa̧y maaga jar teeberɛ woo de jar depuy mo kol wo barge wa.

Ndi hay de kooge ga a hay bay de woore ga a mo joŋ  jar sara sara wer ti hɔge se wa. Ndi hay bay yoŋ ɗiggi ɓi wa, e jar se maaga hay wo wa̧a̧re sir hay raw wo ga ndi da men sir go.

De maaga ndi hay ꞌwa siŋ lɛ Amerik mo kay, a hay wa̧a̧ me gan di fɛrle liŋ ti boŋga has so.

Ɓuy tuu go ti tamsir, jar debaŋ laa wa̧a̧re ɓi. Siŋrɛ ɓin woo de ɓaa ɓin jon woo nɛn kooge ne jar ŋgaɓa ga de deele hay bay ti jar teebɛre Afirik sud wa.

Ndi garaꞌga se de ꞌwa siŋ de wa̧a̧ cuway ti sir ɓi, kɔ a mo wa̧a̧ ba ga hay nɛ.

Tamsir daa jo̧o̧ ɓi e a ya̧a̧ waare ɓi ti sir woo pur debaŋ. Ndi daa poɗge siŋ pur, ndi ꞌwa siŋ pel jar kuluri go ti yer sir ɓuy. Ma tenɛn ɓi wóó wɛ, a maa guꞌwa diŋ poo meꞌ.

Ndi hay bay ka̧a̧ge nɛn ꞌawa siŋ ti sir maaga ndi biŋ wa, jar hay bay go de pogge ni wa.

Ni pam, wur go selaŋga raw a lɛ de maaga Nelson Mandela kol diŋ waŋ sir ma Afirik sud mono.

Jar maa de fay ŋgaɓa raw woo jooge wa̧a̧re sir no e jag liŋgi ma de bay faage raw woo kolge diŋ ɓaa ma hɛrɛsge go. Ti taw ge tí ɓen mo kay, ndi raw liŋ de jiili ma de fay de kaŋ ɗiggi pel.

Blam sen, ndi ka̧a̧ maa ꞌwa siŋ  ɓi sir maa de pogge e de deele. Jar maaga ho̧o̧ge woo sara sara ka̧a̧ wo ɓara so maa kee siŋ jag do ka̧a̧ra.

Ndi kay nen po ga mo bá jag wer gan di hay de ɓoꞌ wuu e de ȩgrɛ. Ndi wa̧a̧ cuway nen siŋrɛ ɓin woo ɓuy.