Pǝ̂rǝ ma ! Arà ! Amʊmpǝrǝ n ta wuuu naa ace atɩ ri bapigii banan, ba cǝm bʊcǝma bʊ. Bani pɩ gǝŋ Akiima, Laamɩɩ, Ásaná na Marɩyam. Ba ɖa ba ɖa ma ni, n'ʊshilé ɖǝn ba ta na ce gʊkamakama, ɩyupi ɩpiɖeka.

Ba shee tɩ́ kpa gaɖu gaɖǝn ma, gatubʊmbɔnɔ gaɖe ga bɔlɔ. Na ba ri bawor banyɛ nɩ naa ba sǝ̂ra apaɖa gatubʊmbɔnɔ gaɖe afǝl.

Gʊkamakama gʊɖe nɩ, na bapigii ba ŋǝ gʊyo gʊbʊmbɔnɔ gʊɖǝn gʊ yiɖe atǝm ɩyupirana gɩshɛbʊ ma.

Na ba lǝ afana wàà, baɖe ba nǝ ba sǝ̂u ɩnyine nɩ apiɖe n'ɩyupi ɖe.

Ŋkǝŋ na Laamɩɩ, Ásaná na Marɩyam ba bǝla bɩnyinesǝuka, asaa n'Akiima anɖǝnɖǝn a sǝu ɩjà.

Ŋkǝlǝ́ nɖee ba rgǝ atǝn ma, na ba ŋǝ wàà, Akiima anɖǝnɖǝn a piɖe ka ɩyupitolo.

Ŋkǝŋ na Laamɩɩ, Ásaná na Marɩyam ba sǝba na lee Akiima sààrɩ́. Na ba tɩ shɛʊ apɩ afal.

Akiima a cǝpra abǝɖa ɩyupitolo naa asǝba na piɖe ɩyupirana.

Ɩ lee cei ma, Akiima a piɖe ɩyupirana arŋǝ agashɛɩ naa ashɛʊ atɩ kul gatubʊmbɔnɔ anɖǝnɖǝn.

Gato gaɖe kʊkul nɩ n'Akiima 'ɩyupi ɩ fǝɖa bʊto nɩ. Caa !

N'a cam ʊnyana naa asǝba gako.

Akiima a ŋǝ gafɩlɩ gabʊmbɔnɔ naa ari jɩ.

Sáà nɖee Akiima a na shɛʊ agaɖu ma, n'asáʊ ɖǝn apǝr gafɩlɩ gaɖe naa ata na gaja.

Asáʊ agɩshelu kagɩsanà gɩɖǝn gɩ fǝɖa.

N'Akiima a tɔɔ jɩ naa atǝwǝ gasana.

Gasana gaɖe nɩ, n'a wa na ɖooɖooɖo kashiiye ɖǝn. Bacǝncǝrja ba tɩ tǝr aŋɔ baɖi laŋ naa apala ɩsanà ɖaa ɖaɖaa kaleu ma.

Ba cam na nɩ gɩsanà gɩɖe naa afʊba na nɩ nnakoro !

Akiima a kpa agaɖufal na nnakoro. Ayar n'anar n'abʊŋʊma bɩcine ɩ kǝr. Laamɩɩ, Ásaná na Marɩyam ba tɩ lee nshɩŋyɔ ɖaa ba paapaa Akiima ma. Ɩ lee Akiima asáà kʊshilé na !

Amʊmpǝrǝ kaayala jɩ gǝŋ. Kaashɩ na gǝŋ wàà, arɛ̀ a pàá tɔ̂nɔ na Gaja ayɔ gʊyá na.

Ce livre a été traduit et publié par l'équipe anii à Bassila. Pour plus d'informations sur le projet anii et d'autres publications en langue anii, contactez-nous :

www.revue-gugu.org

+229 66 66 11 11
Téléphone et WhatsApp

L'équipe anii salue l'équipe de AfricanStoryBook et les remercie pour leur générosité et pour la licence de CC BY.