Pǝ̂rǝ ma ! Arà !
Amʊmpǝrǝ n ce atɩ ri cacá na gasǝwǝ. Ba ɖa ba ɖa ma ni, ʊshilé ɖǝn cacá aɖe ɖa na kulo ɩje agawara nɩ. Ɩɖe lee ɩje ɩsoŋsono. N'a rɩ ɩ gɩshɛbʊ nton naa asǝ atǝn na jɩ.

Sáà nɖee cacá a sǝba apine gɩje na yɛɛ a jɩ̂ ma, n'a rǝŋǝ ʊɖǝn a na kǝ gʊcaŋkɔ ma. N'a lǝ 'ʊcine nɩ wàà : « Óóó, aaɩ. Aŋa na ye ? » Ama n'a tine gʊcaŋkɔ. Ɩɖe lee gasǝwǝ ŋgaɖee ga na rǝŋǝ mbúmó páá ma. « Cacá, jɩ̂ suuru, apala amʊ ma kpâ. » Na ga lǝ wàà : « N sara na gaɖulǝŋka ʊrɔŋ, ɩ kpa amʊ, akɔmɔ gboo ɩ kpa amʊ. » Baɩ na cacá a naa lêe na k'ɩ lee a pâla jɩ ga kpâ na !

Ɩɖe tɩ yor cacá ɖaa a naa yʊ̂ga 'ɩje ɩsoŋsono n'ʊɖǝn ma. Kpaarɩ n'a ɖʊ ʊlomo ʊbɔnɔ ɖǝn atǝn. Sáà nɖee gasǝwǝ ga sǝ atǝn na bɔlɔ kagʊnyɛ na yɛɛ ga lâa gɩje ma, na cacá a ŋala wàà : « Gasǝwǝ, akanyɛ ɩ kpa ajɩwa ! K'á sǝ̂ra ajɩ na ɩ na. Kʊ̂la atɩ shire ɩ. » Gasǝwǝ kanyɛ ɩɖe lafʊ kpa ajɩwa. Na ga wǝl shɛlɛm shɛlɛm halɩ gato sul atɩ shire kanyɛ, naa akɔɔ wǝl akɔɔ atɩ sǝ.

Ama kasáà ɖe, cacá aɖe sǝba na jɩ ɩje ɖe boŋo. Sáàɩ gasǝwǝ ga kɔɔ kpa ma, k'aa kɔɔ ŋǝ ɩje ɖe na. Na ga kiɖe cacá naa alǝ nɩ wàà : « Na ntǝma, ʊ yɩɖa amʊ n pɩ atɩ jɩ ʊjɩʊ akaaɖu ma. Yaa baɩ yaa, ʊ ta tɩ́ pɩ̂ aŋgʊsaʊ, pɩ̂ atɩ jeɖe amʊ, naa ma sǝ̂la akɩ akʊjɩʊ ɖe. » Na gasǝwǝ ga sǝba na wǝl shɛlɛm shɛlɛm na shɛʊ kaaɖu afal.

K'ɩ lǝŋ na, na cacá a sǝba na faŋa gɩjibɔŋɔ kʊjɩʊ faala kʊja nɖee gasǝwǝ ga lǝ nɩ wàà, ga tǝ ga shêe nɩ ma laŋ. Ʊshilé ɖǝn na a ce gasǝwǝ sul. A kpa gasǝwǝ kaaɖufal gɩjibɔŋɔ kʊjɩʊ kaŋkǝlǝ́, sáà nɖee ʊshilè ʊ bǝlǝbǝlǝ ma.

Gasǝwǝ gaɖe ga bɔlɔ kagʊlɔ ʊshilèka ntala nɖǝn laŋ, na shele ʊshilè ɖaa bʊsǝwǝ bʊ shɩ na lee ma. Sáà nɖee gasǝwǝ ga ŋǝ cacá ma, na ga sala nɩ naa ataba nɩ wàà : « Cacá, ʊ pɩ pɩ gɩ mân ajɩ ʊjɩʊ aa ? » Na cacá a tǝlǝ ashee jɩ wàà : « Ɩɩŋ, ɩ tɩɩ cǝ̂m páá, na ntǝma. » Akɔmɔ ɩɖe kpa nɩ gɩshɛbʊ.

Kpaarɩ na gasǝwǝ ga jim bʊto nɩ ashɛʊ katǝntǝn naa apɛmpɛŋɛ tebiri nɖee laŋ ba jɩ̂ ʊjɩʊ ma, n'ayɔkɔɩ ɩ sim ma. Cacá a sǝ gʊtakǝwa laŋ na saa. Ɩ lee cei ma, na gasǝwǝ ga ɖa bʊto akpa naa alǝ wàà : « Cacá, n boŋo nnyǝmǝ, pɩ̂ gɩ tɩ́ jɩ̂ ʊjɩʊ. » Na gasǝwǝ ga kɔɔ mɩyɛ bʊto nɩ acǝŋǝ naa asǝba na jɩ abɔtolo nɖee a kpeɖe ashee gɩjibɔŋɔ kʊjɩʊ ma.

Cacá a lee koŋkaarɩ ayɛɛ a mɩ̂yɛ bʊto nɩ, ama a lee cacá na, k'a lee gasǝwǝ na. K'a sǝra amɩyɛ ace atǝntǝn na, aɖe tɩ kɔɔ na sǝr bʊto laŋ. N'a ta ajim ʊtucine nɩ ayɛɛ a mɩ̂yɛ, ama akoɖǝn k'ɩ lee na. Galaŋ k'a sǝra argǝ bʊto katǝntǝn ajɩ ʊjɩʊ ɖe na.

K'ʊboŋu nɩ, cacá a ŋǝ gʊfaŋa gʊɖǝn. N'a ɖʊ atala tuutuuma akootu nɩ, naa a ɖʊ̂r asǝra asasa bʊto katǝntǝn. A yɛɛ gʊfaŋa gʊpǝlmǝ ɖaa a yɔ gʊyá ma. A kpa ma, n'a ŋǝ gasǝwǝ katebiri a rŋǝ abɔtolo n'ɩjɩʊ ɩfɔlɩ tuutuuma ɩsoŋsono ma. N'a sǝba na mǝn gʊtabara.

Ama sáà nɖee cacá a tɔɔ ari ʊjɩʊ ʊsanka ɖe kpaarɩ ma, na gasǝwǝ ga kǝl nɩ naa alǝ nɩ wàà : « Cacá, k'ɩ sim akakootu a ɖa akʊʊlɔ laŋ naa a jɩ̂ ʊjɩʊ na ! Amasul kǝ ba na lee gǝŋ na. » Cacá k'a kɔɔ faŋafaŋa na, na wàà : « Óóó, gǝŋci, ʊ wʊɖa ɩjá. Gasǝwǝ, maakɔ laŋ na n na faŋa ? » N'a laa akootu.

Ama cacá a laa akootu n'atala ma, agʊlɔ k'ʊʊ kɔɔ ɖʊ̂r a sǝ̂ra ɖa bʊto katǝntǝn na, n'ɩ taa nɩ akɔɔ n'alaŋlaŋ. Kpaarɩ n'a ŋǝ agʊlɔ bʊto kalaŋ. Cacá a koɖo agayɛ n'ʊcimpɩyɛka na kiɖe gasǝwǝ ga ɖa na jɩ kɩjɩʊ ɩsanka ɩŋunii ma.

Amʊmpǝrǝ kɩsǝi na kɩɩja nɩ gǝŋ.

Ce livre a été traduit et publié par l'équipe anii à Bassila. Pour plus d'informations sur le projet anii et d'autres publications en langue anii, contactez-nous :

www.revue-gugu.org

+229 66 66 11 11
Téléphone et WhatsApp

L'équipe anii salue l'équipe de AfricanStoryBook et les remercie pour leur générosité et pour la licence de CC BY.