Aliu ɩbɔrɩɖǝuja n'agakompifala ŋgaɖee ga fǝlǝ ma.

Ɩjikǝuka kaŋɔrɔ a lee ka tam nɖee Aliu n'abakaŋakanama bagʊnyɛ gʊ na toŋo gakompifala nɩ awu ma.

Muiba gabʊrʊpi ga wʊɖa ɖaa gaja gaɖǝn ma, ga sǝba ka akpa. Ba toŋo jɩ na na lɔɔrɩ aŋono gʊbɔ gʊtoloyar akpa na ma.

Aliu n'abakaŋakanama ba pɩyɛ ʊcine ashee Muiba, ɖaa a kɔlaŋ naa naa yɛlɛŋshɩ ma laŋ.

Ɩshilé ɩtʊrka kaŋkǝm na Muiba a ŋǝ alaafɩya. N'a sǝba na cǝr n'ɩbɔrɩ basaaka gakompifala nɩ.

Ɩjikǝuka kaŋɔrɔ 'ʊshilé ʊfɔlɩ ɖǝn na ɩlɩkɔptɛɛ a rgǝ gakompifala nɩ.

N'Aliu n'abakaŋakanama ba ceecee gaka laŋ. Na ba ŋǝ gabʊrʊpi gaɖǝn ɩlɩkɔptɛɛ nɩ, baɖe ba kan jɩ kuntu.

Ga jɩ ka wàà, Nabil. Nabil aɖe ɖa kuntu laŋ. Nabil a wʊɖa ɩshilé ɩnʊn ɖaa ba ŋʊm nɩ ma. Aliu aɖe tɩ ɖǝu nɩ na beberɔŋ.

Kokoli ʊkompi ariutaja nɖee a kpa aŋɔrɔ ɖe nɩ nɔɔ ma na gǝŋ, Maarɩya. Gatapiila gafʊmka garánà ga pɩ ka na nɩ gakompifala nɩ. Aɖe wʊɖa ɩŋɔrɔ ɩkolom.

Maarɩya a lee abʊrʊ gɩŋʊnʊyʊlʊyar kaapi jɩ, na ba man ajɩ gʊsoro kpaarɩ n'ʊko kaapi. Gani ga jɩ ka wàà, Sʊmaɩla. Ba na man man na ce baa ŋka na.

Gɩjibɔŋɔ gɩɖǝn jɩ Aamɩya 'ʊkpaʊ ʊ ŋǝnǝ bɛrɛ baŋunii. Aamɩya a lee gʊrɛ́ɛ kaapi jɩ.

Aamɩya a wʊɖa ɩŋɔrɔ ɩnʊn. Agasana ga lama ma laŋ, agʊlɔ gʊ ci.

Aamɩya 'ʊɖɔ ʊ lama ma, Aliu a na boɖo gʊyo kʊ naa aye shee nɩ beberɔŋ.

Ɩshika bajala Sherifu na Sherifa ba kpa ɩjikǝuka kaŋɔrɔ agɩcɩɩca jɩ. Bʊ lee bʊyalɩpi bʊ. Ba ŋʊm bʊ na bʊkɔŋkɔŋɔ̀ bʊtʊrka nɩ, bʊɖe bʊ tɩ shɛɖɛ páá.

Bɛrɛ baŋunii ba ɖa ʊcimpɩyɛka nɩ, aɖʊwaa Sherifu a kpa gakompifala nɩ ma, bɔkɔɩ ɖǝn kaŋkǝm na a ci. Ama Aliu n'abakaŋakanama ba sǝra afʊra Sherifa.

Bakompi baboŋoka mbaɖee ba kpa ɩjikǝuka kaŋɔrɔ ɖe nɩ ma, na ba na yɩɖa wàà, Kamal, Kebi na Kaɖɛɛr. Ayɩɖa ɖe kɩbɔrɩ ba lee bʊtabɩyarɩpi bʊ. Bʊ wʊɖa bɔkɔɩ banyɩʊ ɖaa ba ŋʊm bʊ ma. Bʊ kpa ma, akɔmɔ ɩɖe tɩ caarɩɩ bʊ páá.

Aliu n'abakaŋakanama ba sɔlɔ ɩbɔrɩ baŋunii anyɔnna kabʊsakampi.

Kanɖee a wʊɖa ɖɩgaŋgaŋ awu ma na gǝŋ, Laamiiɖi gakʊmpi. Ga na tɔɔ Aliu abʊŋǝ baa sáà apaŋa na, na lugo.

Ŋkulo ŋŋunii n na lee ntǝma njɩ páá baa sáà apaŋa na ashee ɩbɔrɩ kʊtɔjʊ gakompifala nɩ. Na kantam wàà, ʊshilé ɖǝn bʊ tǝ bʊ tɩ́ sǝ̂ra atɔjɩ balɔ naa ba tɩ́ kɔɔ kɔ̂ɔ baŋŋɔ nɩ.

Kɔɔ tʊ̂r gɩsɔɔ nfɔlɩ naa ashee mbuye nɖe !
1- Ɩbɔrɩ baɩ ba kpa ka ɩjikǝuka kaŋɔrɔ nɩ ?
2- Abɔrɩ apaŋa a sǝba ka kpa ?
3- Bʊja baɩ na abɔrɩ ɖe a wʊɖa ?
4- Abɔrɩ apaŋa a pɔɔ ka ŋkǝm ɩjikǝuka kaŋɔrɔ nɩ ? Bʊja baɩ na abɔrɩ ɖe a wʊɖa ?

5- Abɔrɩ apaŋa a lee ka ajala awu, a kpa ɩjikǝuka kaŋɔrɔ nɩ ma ?
6- Bʊja baɩ na a wʊɖa ?
7- Abɔrɩ apaŋa a lee ka ʊŋono bannɩnɩ bʊkpaʊ nɩ ?

Ce livre a été traduit et publié par l'équipe anii à Bassila. Pour plus d'informations sur le projet anii et d'autres publications en langue anii, contactez-nous :

www.revue-gugu.org

+229 66 66 11 11
Téléphone et WhatsApp

L'équipe anii salue l'équipe de AfricanStoryBook et les remercie pour leur générosité et pour la licence de CC BY.