Naane, fowru bee dawngal e coobiri soosey, koo nde e ɗum feerootiri seɗɗa.

Dawngal e waawi fiirugo, ammaa fowru sey wanca bee koyɗe tan.

Nyalnde feere, fowru yeli anndugo huunde feere haa soobiraawo muuɗum, sey ndu ƴami dawngal, "Ɗu'um daneejum gonɗum ley daande maaɗa saa'i fuu, ɗum ɗume?"

Dawngal sey jaabii, "Ɗum kusel ɓellinngel ngel mi nyaamata dow asama. E mi nyaamangel daga duuɓi ɗuɗɗi, jooni ngel sagake e daande am."

No fowru naniri haala kusel, sey joode puɗɗi simtugo diga honnduko maaru, ngam no ndu ɗawndu nden boo ndu yiɗndu kusel soosey. Fowru haajani nyaamugo kusel ngel.

Ammaa noye ndu yottorto kusel ngel e asama, to ndu walaa biyeeli fiirugo? Fowru sey ƴami dawngal, "Useni, soobiraawo am, wuƴam liiliiji maaɗa goɗɗi seɗɗa, mi waɗana hoore am biyeeli. E mi yiɗi mi waawa fiirugo ba maaɗa."

Dawngal no marngal barka, ngal walaa halleende, sey ngal hokki fowru liiliiji goɗɗi. Fowru nyootiɗi waɗi biyeeli. Ndu haɓɓiɗi e ɓanndu maaru, ndu we''iti juuɗe maaru ngam fiirugo haa asama.

Ammaa ndu teddanii liiliiji soosey, ɗi potaayi firnugondu. Sey ndu ɗaɓɓita dabareere feere fahin.

Fowru wi'i dawngal, "Mi, ƴamele, soobiraawo am, mi foti mi jogoo wicco maaɗa, piiriden dow asama?"

Sey dawngal jaabi, "Too, walaa aybe. E mi anndi no ngiɗirɗa fiirugo. En piiray jaango fajiri."

Nde weeti, fowru jogii wicco dawngal boɗɗum, dawngal we''iti biyeeli muuɗum, sey ɗum fiiridi dow asama.

Dawngal fiiri, ngal fiiri, ngal fiiri naaka ngal somi.

Ammaa fowru wi'i, "Ɓeydu fiirugo seɗɗa fahin, soobiraawo am!"

Fowru e yi'a kusel daneyel ɓellingel dow, lutti seɗɗa ɗum yottoo ton. Honnduko maaru e heewi joode.

Nde ɗum yotti tayre kusel ɓellinde artunde, sey fowru nani haƴƴaago. Liiliwol wicco dawngal gootol fettake junngo maaru!

Kap! Fahin, fowru nani haƴƴaago feere. Kap! Fahin. Dawngal nani selɓitake deydey, nden boo nawɗum, ɗum wicco muuɗum, e ɗustoo.

Ngal yimi, "Liiliiji dawngal, pette ko'e mooɗon. Liiliiji dawngal, pette ko'e mooɗon."

Jaabaago dawngal, sey fowru yimi, "Liiliiji dawngal njogee, taa' pette ko'e mooɗon. Liiliiji dawngal njogee taa' pette ko'e mooɗon."

No ɗum timmiri: Liiliiji wicco dawngal potaayi njogoo fowru fahin, ɗi njoofake ɗi fuu. Ndu feere maaru hakkunde asama e leydi, ndu teetoyake, e ndu yana.

Sey ndu diwi dow kusel daneyel ɓellingel. Fowru numi, hakkilaayi, to ndu nyaami kusel nge'el, ngel jogotondu.

Nde fowru haɓdi jogaago bee nyaamugo 'kusel,' ndu tawi ɗum ruldere tan!

Jooni fowru e yana bee semmbe. Ndu wulli, "Mballeeyam, mballeeyam!" Ammaa walaa nanoowondu. Dawngal majji nder duule.

Fowru yani e leydi bee semmbe, ndu waali bee de''eende mintiiji seɗɗa. Sey ndu huyli, e ndu uumaa nder nawɗum ngam koyngal gewngal bee ɓattaaje ɓaleeje e ɓanndu maaru fuu.

Daga nyalnde nden haa hannde, fowru e laƴa, e ndu mari ɓattaaje e ɓanndu maaru fuu. Ndu heɓaayi fiirugo fahin.

Soobaaku hakkunde maaru bee dawngal timmii.