Helo. Mulishani, nine Ntenga. Ndi kakashana ngootukashana tuumbi. Lelo nalikwata ing'wena mumubili wandi. Teeti muimone. Nomba nalishiba ukuti emoyaba.

Ishina ni Kasansa Wabipisha. Aafisama mumubili wandi lelo tacena abanandi.

Teeti afume mumubili wandi nookwingila mu mubili obe nga waikala mupepi naine, nelyo ilyo waikata ukuboko kwandi.

Teeti afume mumubili wandi na ukutolokela mumubili obe nangu twingaliila pamo nangu, ilyo tulele panshi pamo tuletuusha.

Ing'wena yandi, Kasansa Wabipisha, aaba muli ine ukutula ilyo naafyelwe. Aalitemwa ukulya abashilika bonse abancingilila kutushishi na amalwele.

Nga alya abashilika abengi mumubili, ndalwala saana. Ndafwilwa na ukuya ku sukulu na ukwangala na banandi.

Mfwile ukunwa umuti cila bushiku panshita imo ine. Ngateifyo, ing'wena ilashibuka naikalipa icakuti nakabili yalya abashilika bandi.

Nshifwaya ileeciteefyo. Eico, ndebukishako Baamaama ukumpeela umuti panshita iyalinga.

Nga naalya ifyakulya ifisuma ifili nga umusalu neefisabo, abashilika mumubili wandi bala koselako. Ing'wena yandi ilafwilwa ukubeekata. Ndemona ilaya mukulaala panoono.

Pantu ndoomfwako bwino kabili ndaba naamaka yamwangala nabanandi nakabili. Ndasansamuka saana nga yayalaala pantu ndangala.

Bamaama bantwele ku kiliniki mukupoka umuti uwakuliisha ing'wena yandi. Ulailaalika kabili, tailya abashilika bandi.

Elyo ndacita ifyakunsansamusha ifyo abaana bambi bacita pamo nga ukubutuka, ukunina imiti nookucinda.

Nalibatemwa saana Baamaama. Baaba noomutima uusuma kabili baacikuuku. Balampela ifyakulya ifyakumanina nafimbipo ifya kukosha abashilika bandi pakuti nilalwala.

Nga nalwala, balantwala kucipatala ukwabula kuposeenshita ukutiila naba bwino. Ndatemwa nga bambika pamoolu ukumbelengela utushimi ilyo nshilasendama.

Panuma Bamaama nga bandalika, ndatontonkanya pafintu ifingi. Ntontonkanya pafyakwishiba ukubelenga pa sukulu likalamba.

Nganakonkanyapo ukunwa umuti wandi uulalika ing'wena yandi, nkasunga Baamaama na ukulababelengela utushimi lintu bakakota nookuleka ukumoona bwino.

Nganakula, ndefwaya nkasambilile. Ndefwaya nkaafwilishe ukusanga umuti uwakulalika ing'wena shonse ishaikala mumibili yabantu umuyayaya.

Nkasambilila ifyakwikala na ing'wena yandi mu mubili nookulailalika apo ningapesha.

Kabili nkakwata abanandi abengi, na ukukwata ifyakusansamusha ifingi cila bushiku.

Baamaama, baamaayosenge na baayama kabili nabanandi baalintemwa nangu nakwata Kasansa Wabipisha mumubili.