Mooni! Zyina lyangu ndime Ntombi. Ndimwana musimbi mbubwena mbuli bana basimbi bambi, nokuba kuti ndijisi ciwena mumubili wangu. Inga tiimwamubona pe, pele ndilizyi kuti nkwali.

Zyina lyakwe ngu Sikulinjizya Mubyaabi. Uliyubide mumubili wangu pesi tanyonyooni beenzuma.

Inga tazwi mumubili wangu akunjila muli wako naa koli munsi lyangu antela kondijatide kukwaanza kwangu.

Takonzyi kuzwa mumubili wangu akukusotokela mumubili wako notwaabana cisusulo andime, antela koona ansi andime ciindi notupumuna.

Ciwena wangu, Sikulinjizya Mubyaabi, ulaa ndime kuzwa nindakazyalwa. Ulayandisya kulya basikalumamba balwana tuzunda twamalwazi mumubili wangu akundikwabilila kumalwazi.

Kuti naa walya basikalumamba bangu banji, ndilaciswa kapati. Eeci cindipa kuti kandilovwa kucikolo akutasobana abeenzuma.

Ndileelede kunywa musamu mazuba oonse muciindi comwe. Kuti cataba boobo, ciwena wangu ulabuka kanyemede akulya basikalumamba bangu alimwi.

Tandiyandi kuti kacita boobu, aboobo ndilabayeezya Bakaapa kundipa musamu weelede muciindi ciyandika.

Kuti naa ndalya cisyumani amicelo, basikalumamba bangu balabaa nguzu akutalekela ciwena wangu kuti abajate.

Ndiyeeya kuti ulaunka kukoona kwaciindi cili mbocibele, nkaambo inga ndayumya akukonzya kusobana abeenzuma alimwi.

Ndilakkomana naunka kukoona alimwi ndilakonzya akusobana.

Bakaapa bakanditola kucibbadela ciindi cakainda kwalo nkundakapegwa cakusanina ciwena wangu. Eeci cipa kuti aone katalyi basikalumamba bangu.

Mpoona ndilakonzya kucita zyintu zyicita bana bambi, mbuli kulunduka, kutanta akuzyana.

Ndabayanda Bakaapa kapati. Mbabotu akuloma kuli ndime. Balandipa cakulya cibotu ama bitameni apa kuti basikalumamba kababa anguzu, kupa kuti kanditaciswi.

Na kuti ndaciswa balanditola kucibbadela cakufwambana ikutegwa ndipegwa musamu undiponya.

Ndilayanda kuti bandoneka amabelo akundaanina twaano nketana ona.

Bamana kundooneka Bakaapa, ndilayeeya zyintu zyinji. Ndilayeeya zyakubala kucikolo cipati. Kuti naa ndazumanana kunywa musamu upa kuti ciwena kaona, ndiyakubalela Bakaapa akubabalila twaano baakucembaala kapati akutabona kabotu.

Ndaakuba mukaintu, ndiyakuyanda kwiiya zyamisamu yanseba. Ndiyanda kuti ndikajane musamu uyakucita kuti baciwena boonse mumibili yabantu bakoone kabatacibuki alimwi.

Ndiya kwiiya kupona aciwena wangu akumooneka mbuli mbwecikonzya.

Ndiyakubaa beenzuma banji mbwendikonzya.

Alimwi ndiyakubaa ciindi cakusobana mbuli mbweyanda mazuba oonse.

Bakaapa, bamakaintu bazyalwa abaama, abamacisya, abeenzuma balandiyanda, nokuba kuti ndijisi ciwena utegwa Sikulinjizya Mubyaabi upona
mumubili wangu.