Mbukaaniinga! Kale-kale kwakali mpulazi nsyoonto mufwaafwi amunzi musyoonto.

Mumunzi oomu, kwakali kukkala kana kankuku kaitwa kuti Dezi.

Bumwi buzuba, nkiinga Dezi kakati, "Ndaakukomena,ndiyanda kuya kuuluka mujulu mumulengalenga."

Nozyakamvwa boobo, zyoonse nkuku zyakakaseka.

Zyakaamba zyakati, "Yebo ulinyongene, tatucisobani anduwe pe."

"Dezi, toonse tulakonzya kubbakamuna mababa pele nkuku tazyicikonzyi kuuluka," banyina bakamwaambila.

Dezi kunyina naakatyompwa. Mazuba oonse wakaliisya kubbakamuna mababa.

Bbaku, bbaku, bbaku, wakali kulibbakamuna pesi kunyina naakali kuuluka!

Naakali kuliyiisya kuuluka, wakali kweezyeezya kauluka kumwi kalanga nkuku ansi.

Wakali kweezyeezya kauluka mujulu kwiimpana atumembya atumpye. "Kkwe, kkwe, kkwe!" bakagambwe kabati, "Nkuku yuuluka!"

Bbaku, bbaku, bbaku! Mazuba oonse wakali kubbakamuna mababa.

Wakali kunyamuka mujulu akuwa ansi alimwi.

"Taakwe netiikacikonzye kuuluka pe!" Dezi wakaambila banyina kumwi kalila. "Zyililuzi nkuku zyaamba kuti takukonzyi kuuluka."

"Dezi, ulaandene kunkuku zyimbi. Tazyiyandi kuluuka mbuli nduwe! Inga wacikonzya," banyina bakaamba."

Buzuba bwakatobela Dezi wakatanta atala aciluli cangaanda cankuku akulibbakumuna mababa akulibbakumuna alimwi..

Bam!

Nkuku zyimbi zyakaseka kapati. "Kkoo, kkoo, kkoo! Twali kukwaambila! Swebo tatuuluki!"

Pesi buzuba bwakacilila wakatantisya mujulu kapati, kujulu kwini kwacaanda cankuku.

Bbaku, bbaku, bbaku! Dezi wakabbakamuna mababa akwe.

Wakauluka kuya mujulu kabbakamuna mababa akwe.

Wakazumanana kuuluka! Muwo wakamugwasya kuulukisya kuya mujulu.

Tumembya atumpye katuti, "Cilagambya! Nkuku kuuluka!"

Ankuku zyimbi zyakayanda kuba mbuli nguwe.

Zyakaamba, "Ma Dezi, ulicigambyo!"