Pǝ̂rǝ ma ! Arà !
Amʊmpǝrǝ n fǝl wuu naa ace atɩ ri gʊyà ɖǝn n'abʊŋʊma.

Baa njǝŋ gʊna aɖe tɩ lee ʊjɩʊ na shee gafala. A na pɩ n'ʊjɩʊ na tebiri laŋ naa ba jɩ̂.

Gʊyà a na yʊga ntaŋkɔ naa naa lǝ ʊpur asǝbaka wàà : « Amʊ n lee ka ʊŋono, amʊ n sim ka ma kûr gaɖu gabʊmbɔnɔ. Câm akɩja na saa ʊ ta tɩ́ kpǝ̂r. »

N'a na lǝ ʊpi anyɩʊtaja wàà : « Amʊ n lee ka ʊŋono, amʊ n sim ka ma kûr gaɖu gabʊmbɔnɔ. Câm akɩɩja na saa ʊ ta tɩ́ kpǝ̂r. » A shɩ na shee pɩ na ce ma, aɖe tɩ faa kʊsǝŋkǝlʊ akʊn na shee pɩ halɩ ajala anja n pɩ ka atɩ jǝba awu.

Gʊyà aɖe tɩ saa ɩsǝŋkǝlaka na shee aɖe n'akar. Bapi kǝ ba na lǝ gaɖǝn na, baɖe ba tɩ jɩ bʊjɩʊ.

Bʊja bʊ fǝl, bapi ba kpǝr. 'Baya na 'bana ba kpǝr, alɔ ɩ buro. Bapi ba na kiɖe 'bana na 'baya.

Ʊshilé ɖǝn ʊjɩʊ kaakɔŋkɔŋɔ̀ ga kǝ ma, ʊpi asǝbaka a yʊga ka ntaŋkɔ ɖaa a cee na lee ma, ama kʊshilé ɖe na a ɖʊ ataŋkɔ ɩjala ashee 'baya na 'bana.

N'a lǝ ayar n'anar wàà : « Ɩ cee kur anyɩntaŋkɔ boŋo. Nnyǝmǝ ataja sáà a cim ka gǝŋ. Atʊ gboo, gɩ kpǝr boŋo. » N'a ɖʊ ataŋkɔ ɩbʊmbɔnɔ ashee bapar basoro na kǝbasǝmprǝ.

Ŋkǝŋ na gʊyà a tɩ́ lige bʊkɔ́ɩ a cee lee tam nɖee bapi ba jǝba ma. Gʊna na gʊyà ba tǝlǝ wàà, k'ɩ lee bʊkɔ bʊsoŋsono bʊ baɖe ba cee lee na, na ba taba babapi suuru. Babapi gboo ba lǝ aɖʊ wàà, kǝ ba lêe babapi gǝŋ ayɔ na.

Ampǝrǝ kɩɩja na kɩsǝi nɩ gǝŋ.

Ce livre a été traduit et publié par l'équipe anii à Bassila. Pour plus d'informations sur le projet anii et d'autres publications en langue anii, contactez-nous :

www.revue-gugu.org

+229 66 66 11 11
Téléphone et WhatsApp

L'équipe anii salue l'équipe de AfricanStoryBook et les remercie pour leur générosité et pour la licence de CC BY.