Pǝ̂rǝ ma ! Arà !

Ampǝrǝ n ce atɩ ri gʊromò gʊɖǝn gʊ ɖa bʊto nɩ ma. Ɩɖe kpa kʊ, gʊɖe gʊ tɩ yɛɛ gʊ ɖôo aka.

Ŋkǝŋ na abʊŋajakpa a na lǝ kʊ wàà : « Lêe nɖǝnɖǝn, ʊ ta ɖôo aka, akɩmpǝu n tɩ n kʊ̂ yɔgʊʊ ! »

Ama, gʊromò gʊ shɩ na yɛɛ gʊ ɖôo aka ma, na gʊ jim jim afǝl.

Gʊromò gʊ ɖoo aka ma, na gʊ yiɖe akiɖe kiɖe asir.

Mbulo nɖǝn sul, na gʊ wa n'agɛɛma nɖee ampǝu n lee bʊkooreto ma.

Tam nɖee agɛɛma a sǝba na cǝpra agʊlɔ na pɩ na bʊto bʊrana faʊʊ ma, na gʊromò gʊ kpa asampǝna kpaarɩ ata ajim ɖooɖoo ashɛʊ.

Kaŋkǝm na gʊ ŋǝ ŋkʊnakʊna n ɖʊ ʊtonu ma.

N'ʊtonu ʊ sir gʊromò akal n'asampǝna ɩ kɔɔ kpa kʊ.

Ŋkǝŋ n'ʊtonu ʊ shɩ kampǝu na gʊ ta gɩkǝŋgɩkǝm ajim mbulo nɩ.

Ama, ʊtonu ʊɖe shɩ kʊ boŋo, kagʊlɔ gʊɖe gʊ ta fʊʊ fʊʊ, asǝ bʊto.

Gaɖuɩ gʊromò gʊɖe gʊ pra ŋkoruma naa aŋǝ gaɖuɖaka gafɔlɩ, ntakǝwa kagɩmompi ma na gǝŋ. Kampǝu nɖe n kʊ atǝr akɔkɔ.

Ɖoo kasáà ɖe na ŋkoruma n ɖa afǝlǝ na gʊromò. Gʊromò kampǝu nɖe n ren, gʊɖe gʊ tɩ ɖa bʊto nɩ, ŋkoruma kampǝu nɖe n cir, nɖe n tɩ ɖa atakǝwa kɩmompi.

Ampǝrǝ kaayala jɩ gǝŋ.

Ce livre a été traduit et publié par l'équipe anii à Bassila. Pour plus d'informations sur le projet anii et d'autres publications en langue anii, contactez-nous :

www.revue-gugu.org

+229 66 66 11 11
Téléphone et WhatsApp

L'équipe anii salue l'équipe de AfricanStoryBook et les remercie pour leur générosité et pour la licence de CC BY.