Pǝ̂rǝ ma ! Arà !
Ampǝrǝ n ce atɩ ri ʊsoro nɖee k'a na yɛɛ aɖa asǝla na bawor na ma.

K'a na yɛɛ gboo wàà, akar a naa jêɖe bawor mbaɖee ba ɖa asǝla na pɩ ma na.

Ʊshilé ɖǝn na a ta afǝl ŋŋɔ nɩ atɩ cǝ gafala alǝŋ na bawor.

Ba kpa ncǝn n'akar ma, aɖe tɩ ɖoo baa njǝŋ gajaka, ama gɩteŋshile k'a na kpa afal were na.

Gɩteŋshile gɩɖǝn jɩ ʊsoro ɖe a ɖoo k'a cee kpa afal na. Ŋkʊnakʊna nɖǝn nɖe ɖa ŋkǝŋ na ŋǝ ɖaa ʊsoro ɖe a na sara gǝŋ ma.

Na ŋkʊnakʊna n ce atɩ na kǝ gafala gaɖe kagʊcaŋkɔ.

Ʊsǝmprǝ a yɔ wàà, ʊkúr na, n'a tine gʊcaŋkɔ. Na ŋkʊnakʊna n ta ajim ʊsǝmprǝ ɖe laŋ ari nɩ akur.

Sáà nɖee ʊsoro ɖe a kpa afal aŋǝ wàà, ŋkʊnakʊna n kur akar ma, k'a kɔɔ yɔ ŋgaɖee a lǝ̂ ma na.

Bʊkɔ́ɩ bʊ pala naa ɩ sara gǝŋ ma, ʊsoro ɖe k'a na yɛɛ a ɖâ asǝla na bawor na ma laŋ.

Ampǝrǝ kaayala jɩ gǝŋ.

Ce livre a été traduit et publié par l'équipe anii à Bassila. Pour plus d'informations sur le projet anii et d'autres publications en langue anii, contactez-nous :

www.revue-gugu.org

+229 66 66 11 11
Téléphone et WhatsApp

L'équipe anii salue l'équipe de AfricanStoryBook et les remercie pour leur générosité et pour la licence de CC BY.

Mbʊpá njala nnɖe n tɩ lǝ atʊ ɖaa ʊsoro ɖǝn k'a na yɛɛ a ɖâ asǝla na bawor na ma, agalei.