Pǝ̂rǝ ma ! Arà !
Ampǝrǝ n ce atɩ ri ayifala ɖǝn ba na yɩɖa wàà Opiyo ma, nʼampá.

Ɖoo tam alǝŋka nɩ, Opiyo ampá nɖe nɩ gɩjibɔŋɔ kʼɩɩ cee ɖa na. Ba ta ŋǝ̂nǝ na ba na lee ntǝma, ɩ ta kpâ pɩ na ba na fol.

Ʊshilé ɖǝn na Opiyo a ce gʊyɛɛ nʼʼɩsna. Kpaarɩ ma, nʼɩsna ba ŋǝ ʊce­le na kǝrǝ ba rî. Opiyo a cu atǝr baŋ­kǝm wuu alama tam.

Ɩ ta kpâ Opiyo, aɖe pâla aŋʊra naa akɔɔ ta atǝwǝ garɛ. Ama kʼa sǝra a ŋǝ̂ ʼɩsna na. Ɩshilé tuutuuma kaŋ­kǝm na a kpa gapapiri gaɖǝn nɩ.

Nʼa ce atɩ ŋǝ gafalayar ɖǝn naa alǝ nɩ wàà : « Ɩshilé tuutuuma na gǝŋ n kǝrǝ ʊcele ma, ɩ kpa amʊ yɔgʊʊ. N tɩ yɛɛ ma ŋʊ̂ra. »

Nʼʊsoro ɖe a tǝlǝ na nɩ wàà :
« Sǝ̂ atǝn aŋʊra. Ʊ tɩ yɛɛ bʊto aa ? »

Ʊtunyem ʊ kpa Opiyo ma laŋ na, a nyem bʊto naa aɖa atǝn afol.

A ŋǝnǝ ma, kʼa kɔɔ na ŋǝ akoɖǝn na. Nʼa ŋʊn ʼɩnyine atine ace akɔɔ ace akɔɔ.

Nʼa na lǝ ʊsoro ɖe wàà :
« Bʊkɔ́ɩ ʊ shee amʊ n nyem ma, kǝ bʊ cǝm na. Kǝ ma kɔɔ na ŋǝ na aa ! »

Nʼʊsoro ɖe a busu nɩ wàà :
« Gaɖǝn ga mana. Gǝŋ ma, kʼá ŋǝ gɩjibɔŋɔ ayɔ aa ? Ʊshilé ʊ ta cîi gɩjibɔŋɔ gɩ na pɩ. »

NʼOpiyo a taba nɩ bʊlei tuutuuma gɩjibɔŋɔ kanɖi laŋ. Na ba faŋa nɩ ɖaa gɩshilikɔnɔ na gɩjibɔŋɔ ɩ na sa­ra baa njǝŋ ma. Ɩ pala ka na a ŋǝ wàà, gɩjibɔŋɔ gɩ cǝm.

A lee faawɩɩ nʼabasoro bafɔlɩ halɩ gaja ga tɩ kʊɖa naa aɖa ŋkǝŋ ʊshilé ʊpǝlmǝ acǝŋǝ na yɛɛ a kɔɔ ŋǝ̂ ɖaa ʊshilè ʊ na ci ma.

Gaja ga kʊɖa gajaka ma, nʼa taba ʼʊsoro wàà : « Baɩ na ma lêe ace na gɩjibɔŋɔ aŋgapapiri nɩ ? N sɔlɔ wàà, amʊmpá nɩ kǝbaja ba ŋǝ̂ gɩjibɔŋɔ gboo. »

Nʼʊsoro a tǝlǝ ashee nɩ wàà: «Ŋko­mo n ta sǝ̂ba ʊsheeu gɩteŋ­shile ŋgɩ­ɖe, ʊ taa sâra halɩ akɩm­pá nɩ. Ʊ ta kîɖe akɩŋyɩɩ na ce, gɩjibɔŋɔ gɩ tɩ gɩ tǝ̂r akɩŋkǝm.

Ama pàá kîɖe akɩŋkǝm na. Ʊ ta cǝpra akiɖe akɩŋkǝm, gɩjibɔŋɔ gɩ tɩɩ shɛ̂ʊ. »

Opiyo a lee ɖaa ba lǝ nɩ ma. Gɩteŋ­shile gɩɖe nʼa ri nʼampá kʊ­nyɩŋca. A sara na ce ma, ɩɖe tɩ faŋa nɩ wàà, gɩjibɔŋɔ gɩ tǝr aŋkǝm.

Ɩɖe tɩ ɖa nɩ ɖaa a cǝ̂pra ma, ama kʼa cǝpra na.

A kpa agapapiri nɩ ma, bɛrɛ ba kpa asampǝna na taba bawor wàà : « Ʊshɛ­ɖʊ ʊpaŋa na Opiyo a pɩ na ma ashee atʊ gǝŋ ? »

Na ba taba nɩ wàà : « Maakɔ
ɩ jiu ka atǝr akɩŋkǝm na pɩ
gǝŋ ? »

NʼOpiyo a busu pɩ wàà :
« Ambaja, bʊkɔ bʊɖe bʊ jiu gǝŋ ma, bʊ jɩ ka wàà, gɩjibɔŋɔ.

Asampǝna ɩ kpa anyɩn ɖaa ɩ bʊŋa kpa amʊ gboo ma aa? Ama ɩ tɩɩ ŋǝ wàà, gɩjibɔŋɔ gɩ cǝm.

Gaja ga ta kʊ̂ɖa gɩ tɩɩ sǝ̂ra alee atatǝma naa ʊshilè ʊ ta cîi gɩ ɖâ atǝn aŋʊra. »

Ɖaa gɩjibɔŋɔ gɩ pɩ Opiyo agapapiri nɩ ma na gǝŋ.

Amʊmpǝrǝ kaayala jɩ gǝŋ.

Ce livre a été traduit et publié par l'équipe anii de SIL à Bassila.

Pour plus d'informations sur le projet anii et d'autres publications en langue anii, contactez-nous :

www.revue-gugu.org

+229 66 66 11 11
Téléphone et WhatsApp

L'équipe anii salue l'équipe de AfricanStoryBook et les remercie pour leur générosité et pour la licence de CC BY.