Gʊpɔ kanɖiyar ɖǝn a ta ayiɖe akǝu Yeesu àlaŋ na taba nɩ wàà : « Afa­ŋa­ka, maakɔ ɩ sim ka ma lêe naa awʊɖa ŋŋuro nɖee kɩ n wʊɖa gayala ayɔ na ma ? »

Na Yeesu a taba nɩ wàà :
« Maakɔ nɩ ba ŋɔn gʊpɔ nɩ ?
Baɩ na ʊ na rǝŋǝ jɩ ? »

Nʼa tǝlǝ ashee nɩ wàà :
« Shee á sɔ̂lɔ Gaja ƖKOYAR
nʼakɩɩfolu gɩŋunii
nʼakɩŋŋuro ŋŋunii
nʼakɩkashɩ ɩŋunii
nʼakʊʊfaŋa gʊŋunii
naa asɔlɔ akʊwor
ɖaa akɩɩlopí ma. »

Na Yeesu a lǝ nɩ wàà : « Ʊ tam gɩ­shɛbʊ. Lêe gǝŋ, ʊ taa wʊ̂ɖa ŋŋuro nɖe. »

Ama gʊpɔ kanɖiyar a tɩ yɛɛ a fâŋa wàà, aɖe wʊɖa ɩjá naa naa taba Yeesu wàà : « Aŋa na amʊwor ? »

Na Yeesu a cam galei alǝ wàà :

Ʊsoro ɖǝn a ɖoo na Yerusalɛm kampá nɩ asasa na ce Yeriko kampá nɩ. Nʼa fǝɖa bapɩtɩrɩ banyɛ nɩ na ba pɩr na nɩ ʼayɔkɔ anyɔnna ʼayɔkɔ­kara­ka naa akǝ nɩ a ci ŋŋuro laŋ na ba shɛʊ apala nɩ.

Ɩ lee gǝŋ ma, na Gaja kasaraalaaja ɖǝn a sasa akʊn ʊnyɩŋca ɖe na fǝl naa aŋǝ ʊsoro ɖe naa apǝl nɩ afǝl.

Lefii kaja ɖǝn gboo a kpa gaɖu gaɖe naa aŋǝ ʊsoro ɖe ma, naa apǝl nɩ afǝl.

Ama Asamaarɩja ɖǝn a ɖa gasana nɩ naa akpa ʊsoro ɖe sul. A kpa aŋǝ nɩ ma, nʼa ɖa nʼɩshɛɩ, ...

... nʼa kim asǝla na nɩ ajene ʼanyɩŋkɔ afʊr bʊshi na bʊrɛsɛŋkana apar nɩ akɩsa naa ataa nɩ atǝr agaraŋkɔŋ­kɔŋɔ laŋ ace na nɩ gafala ŋgaɖee nɩ ba na cam basana ma, atɩ tɔjɩ nɩ.

Gaja ga kʊɖa ma, nʼa ɖoo nʼɩtanɩ ɩkɔbɔ banyɩʊ ashee gafalayar naa alǝ nɩ wàà : "Tɔ̂jɩ ʊsoro nnɖe. Naa bʊkɔ mbʊɖee ʊ naa jɩ̂ anɖi laŋ awu ɩkɔbɔ banyɩʊ mbaɖe ma, n ta kɔ̂ɔ na fǝl, ma sǝ̂la akɩ." »

Na Yeesu a taba gʊpɔ kanɖiyar wàà : « Akʊŋǝu nɩ, bɛrɛ beriu baɖe nɩ, ka­paŋa lee ka ʊwor ashee arɛ̀ nɖee a fǝɖa bapɩtɩrɩ banyɛ nɩ ma ? »

Na gʊpɔ kanɖiyar a tǝlǝ ashee nɩ wàà : « Nɖee a ŋǝ ʼɩshɛɩ naa akaŋa na nɩ ma. » Na Yeesu a lǝ nɩ wàà : « Akɩ gboo, kʊ̂la ace atɩ lee ɖaa gǝŋ ma ! »

Lʊkaasɩ 10.25-37

Texte anii : © 2019 LINGO-Bénin,
tous droits réservés pour tous pays

Pour toute utilisation hors de ce livre, contactez-nous dʼabord.

Téléphone et WhatsApp (+229) 62 58 04 49 info@lingo-benin.org