Document

Amaanayar aŋyashɛshɛ kaakɛɛshɩlei

Little Zebra Books

Brianna Alexander

Na Yeesu a lǝ ashee baa aŋa na wàà : « Lêe ma garagara, pàá ma gôro awʊɖa baamʊ kakɔɖɛɩ na ! Aɖʊwaa arɛ̀ anɖulinya nɩ kʊɖaʊ kʼʊ ɖoo na ʼamaana sul na, baa maa a cɔɔ wʊɖa wʊɖa kʊyɔgʊ. »

Na Yeesu a kɛɛshɩɩ galei gaɖǝn ashee pɩ wàà : « Ʊsoro ɖǝn a lee amaanayar na naa awʊɖa bʊwara tuutuuma. Nʼabʊwara bʊɖe bʊ cɔɔ ŋʊm páá ashee nɩ.

Nʼa faŋafaŋa na lǝ na shee agʊlɔ wàà : "Baɩ na ma lêe ? Kǝ ma wʊɖa gaɖu gɩshɛbʊ ma ɖʊ̂ amɩjɩʊ àsíyà na."

Nʼa lǝ wàà : "N yɔ ɖaa ma lêe ma :  N tǝ ma kʊ̂ɖa ambʊsakulu naa api amɩjɩʊ kaku naa apɛmpɛŋɛ ɩ, ɩ bɔ̂ɖɔ awala amɩjɩʊ ɩŋunii nʼamamaana baŋunii aɖʊ ncǝn.

Kaŋkǝm, n tǝ ma lǝ̂ aŋgʊlɔ wàà : "Amʊ, n tɩ amaana kʊyɔgʊ ashee bʊja tuutuuma. Ma shêe aŋgʊlɔ ʊŋʊrʊ na jɩ na nyem naa naa jaŋ gɩshɛbʊ !"

Na Gaja ga lǝ nɩ wàà : "Ŋyashɛshɛyar, gɩjibɔŋɔ ŋgɩɖe n tǝ ma câm akɩŋŋuro. Galaŋ àsíyà nɖee ʊ wala aɖʊ ma, aŋa naa tɔ̂ɔ ?" »

Na Yeesu a kɔɔ lǝ acǝŋǝ wàà : « Ɖaa gǝŋ ma na ashee arɛ̀ nɖee a na wala ʼamaana na shee agɩlopí ma ; ama kʼa wʊɖa amaana Gaja kaja na ! »

[...] Na Yeesu a lǝ abakǝŋja wàà :  « Galaŋ na n na lǝ anyɩn ŋgaɖe : Pàá ma fâŋafaŋa yɔgʊʊ ashee ɩjɩʊ nɖee ɩ hɩyɛŋ ɩ jɩ̂ naa aɖa ŋŋuro nɩ ma na...

... pàá ma fâŋafaŋa yɔgʊʊ ashee ayɔkɔ nɖee ɩ hɩyɛŋ ɩ kâra anyɩŋgʊlɔ laŋ ma na. Aɖʊwaa ŋŋuro n lee kpatakɩɩ awu ʊjɩʊ na gʊlɔ gʊ lee kpatakɩɩ awu ayɔkɔkaraka.

Anyɩn, pàá ma ɖâ na yɛɛ yɛɛ bʊkɔ mbʊɖee ɩ jɩ̂ koo ɩ nyêm ma na. Pàá ma ɖâ gʊfaŋa gʊɖe nɩ na. Bɛrɛ mbaɖee kǝ ba yɔ Gaja na ma, ba na cu na yɛɛ yɛɛ ayɔkɔ ɖe.

Ama Anyɩnayà a yɔ wàà, ɩ hɩyɛŋ ayɔkɔ ɖe. Gǝŋ ma, anyɩn, yɛ̂ɛ yɛɛ ma Gaja kaayarɩtǝna, ga tǝ ga pêle anyɩn ayɔkɔ ɖe gboo. »

Lʊkaasɩ 12.15-23 ; 29-31

You are free to download, copy, translate or adapt this story and use the illustrations as long as you attribute in the following way:

Amaanayar aŋyashɛshɛ kaakɛɛshɩlei

Author - Little Zebra Books
Adaptation - LINGO Bénin
Illustration - Brianna Alexander
Language - Anii
Level - Longer paragraphs

© African Storybook Initiative 2018
Creative Commons: Attribution 4.0
Source www.africanstorybook.org
Original source Lucas 12:15-23, 30-31 © 1999 Bible League Intl. Versão Fácil de Ler