Kuren fero gana laa cunju Kawaa. Banju bawoyenniya ti-a yanju-a kasarga.

Yim laa yanju tiro bǝla gadero bǝrdigǝye, kǝndǝgai bǝɍin diye yeno.

Kawa bǝladǝye koldu cǝragǝnni. Dunonjuro kairo. Yanju tia bǝladǝn koldu cǝragǝnni, bǝladǝn sedanna kura kura kada curo kauyen mbeji.

Kawa dunonjuro kairo har yanju tia runju kolje sapkada.

Yqnjuye tiro kulum bǝrinju cukkudi yeno.

"Aiya yekkiyama wuro asunǝmi. Wundumaro bare cinna kagǝmmi, feroni," yeno.

Kawa feroni! Kawa feroni!
Luye are bǝrinǝm bui!
Luye are bǝrinǝm bui!
Kawa feroni! Kawa feroni!
Luye are bǝrinǝm bui!
Luye are bǝrinǝm bui!

Wayenniya, Kawaye yanju tiro bǝrinju kikkudo. Aiya badiyen.

Kawa feroni!
Luye are bǝrinǝm bui!
Kawa cinna kaje, culuye bǝri kǝji yanjuye giwo.

Yanju kǝla feronjuye samje, bǝlanjuro walyen. Kawa fanjuro ngaye dǝgǝlnju kiassa.

Sedan kura laa ngawo kǝskayen gǝrade awo Kawa-a yanju-a mǝnajaidǝa kǝrǝnngen.

Kawa fatǝla kejǝnniya, kowo laa fangǝn. Cinnadǝn aiya yanjuye cǝdidǝa fangen.

Kawa feroni! Luye are bǝrinǝm bui!

"Saptǝne!nia yani gǝni," yeno Kawaye. Ni sedan gǝni wa? Sedan karwu kuttua leyen curo kaunjuyero.

Suwa-a kajiri-aro Kawaro yanju bǝri cukkudi. Suwa-a kaji-aro sedandǝye isi.

Koro sawi yaye Kawa tia duji. Aiya yadǝyedǝa ngǝssiyama Kawa kowodǝa asuji.

Yim laa sedandǝ nanga kiwondo: "Kowonidǝa fallǝkke kowo yanjuyedǝa yinngangagǝkki."

Kannu kura fuje curodǝro kau mbokke sǝmumulle gǝpkeyeno. Kaudǝ kime fitto wallenniya, kannun cuttuluye kindo. Kau kannuadǝ ngowoljonjuyen koyen.

Sedandǝ aiya badiyen, kowonju faldǝna waro.

Kowonju yanju Kawaye gairo waljǝna cǝne kǝji fanji.

Wayenniya sǝwa lǝp, sedandǝ fado Kawayero leyen. Cinnaro kadinniya aiya badiyen.

Kawa feroni! Kawa feroni!
Luye are bǝrinǝm bui!
Luye are bǝrinǝm bui!

Kawa kǝji fanji, kowo kǝji yanjuye fanjǝna. Cinna kayenniya, sedan dagada.

Jaktuwu badiyenniya, sedandǝ tia namuyen. Kawaa cǝdane buwuro gǝpkeyen.

Sedandǝ kǝji fanji kanji kaunjuyero aiyanju cidiyaro sapkada.

"Capalo takkǝna wa masǝnani kuyero adǝro kǝlgǝkki gǝna," cǝni sedandǝ.

Wayenniya balde, yanju Kawaye kureyedǝ gai feronjuro bǝri kikkudo. Aiyanju kido, fero culuwunni. Koro walde kido nga fero culuwunni. Yakkuyedǝn cinnadǝa tǝmbalyen.

Kawa ndaraman bawo. Awo wakkajǝnadǝa asuyenniya, jawal dawari laa madaye ngǝssen.

Capalo kǝmo kura laaro tapciye, kǝlaro gǝnajiye kauwa kaduyen. Leje cinna sedannero salamngeyen. Sedan kala capalo kǝjiye fanje saden cinna kayen. "Nda daudu sedan," yeno yanju Kawaye.

"Kokki duwon aiya kǝji dimi fangekko. Bǝla gadero lekki larusa tadaniyero."

Sedan capalo adǝgai nja waji wa. Yanju Kawayero ngaye ngimbo yeno. "Dane capalo finjǝgǝkke kawu jawalni takkiro," yeno kamudǝye.

Sedan kǝji fanje capalodǝa sadǝn kia.

Yanju Kawaye gana ganayen sedandǝa capalon tapci ngai har kǝmodǝ kero.

Kuwa sedan lǝrǝtto waljǝna kǝnǝmbo boyen.

Sedan sǝngori ngǝssenniya, kamudǝ buwudǝa kaje, kawa kiluwo. Kawa-a yanju-a ngǝrǝmjai ngai fadoro kadira.

Adǝ fuwun Kawa-a yanju-a bǝlanja bǝɍinnin kǝji con kasarga.