Ndegooɗom, waɗiinoo suka debbo pamaro mbi'eteeɗo Safiya. Gaɗa maayde abbiiko, Safiya tan wonndi e inniiɗum.

Nyannde gooɗom, inna on wi'i Safiya kamɓen eggan njooɗowo nder wuro wonnduɓe maɓɓe.

Safiya muuyaay eggol ngol, nden o naati imo wulla, no o waanja gonɗi. Inniiko huli accude mo kanko tan, ngam guuturuwo ladde ɗuuɗuko, mawko sanne, tawaako nder gayɗe, ɗe wuro ngon anndiraa.

Safiya wulli faa naawi, ammaa ɗum haɗaay, inniiko eggude, naako nii, o acci mo ɗon kanko tan.

Inna Safiya wi'i no waddanan mo neema nyannde fuu.

"Mi yiman jimol gooɗom, a faaman ko min non. Suka am, ta maɓɓitanaa baa go'oto dammbugal ngal." Ko inna Safiya wi'i.

Safiya suka am! Safiya suka am!
Wurta, ngaraa, nyaamaa giriyo maaɗa!
Wurta, ngaraa, nyaamaa giriyo maaɗa!
Safiya suka am! Safiya suka am!
Wurta, ngaraa, nyaamaa giriyo maaɗa!
Wurta, ngaraa, nyaamaa giriyo maaɗa!

Jaangoore muuɗum, inna on wartoyi, waddani Safiya neema. O fuɗɗi imo yima:

Safiya suka am! Wurta, ngaraa, nyaamaa giriyo maaɗa! Safiya maɓɓiti dammbugal ngal, o nyaami neema inniiko lamsuɗo.

Inniiko molmi o, nden soƴƴitii wuro. Safiya naati nder suudu, foonditi fukkorgo muuɗum.

Tawi guuturuwa ladde gooɗom no suuɗinoo gaɗa guumooje ɗen, no hettinanii Safiya e inniiɗum!

Wakkati Safiya nyifunoo jeyngol muuɗum, say o nani sawto daande teddungo gooɗom, no yima jimol inniiko dammbugal suudu ndun:

Safiya suka am! Wurta, ngaraa, nyaamaa giriyo maaɗa! Safiya wi'i, "Njehee! On kanaa. Inna am! On guuturwa mawnga non!" Guuturuuwa ngan takkitii, nder mettorgal ɓernde, o majjoyi nder gayɗe ɗen.

Subaka e laasara fuu inna Safiya no waddana o neema. Subaka e laasara fuu guuturuuwa mawnga ngan duu no wara to makko.

Ammaa, wakkati fuu nga wari, Safiya riiwa nga. Nde guuturuuwa ngan no yiɗi faa yima jimol inniiko fuu, imo anndita sawto daande magga teddungo.

Nyannde gooɗom, guuturuuwa ngan heɓi nufaare: "Miɗo waawa wayli sawto daande am heɓa mi nanndina nde e nde inna Safiya!" Nga waɗi duɗal yiite mawngal, nga bugii hayre ɓotiɗinnde gom nder yiite ngen.

Ko hayre nden wuli faa wojji, nga itti nde, nga moɗi! "Gulgulgul!" Hayre wulnde nden wittorii non nder konolol magga.

Guuturuuwa ngan fuɗɗi no yima faa daara yala sawto daande muuɗum waylake.

Nga fitti nder welowelo ko nga nani sawto on nanndii ba sawto inna Safiya!

Jaangoore muuɗum subaka, guuturuwa hejjiri ɓaade Safiya. Ko nga yottii dammbugal ɓaade nden, nga fuɗɗi inga yima:

Safiya suka am! Safiya suka am!
Wurta, ngaraa, nyaamaa giriyo maaɗa!
Wurta, ngaraa, nyaamaa giriyo maaɗa!

Safiya weltinii ko nani sawto daande welnde hano nde inniiko nii. O maɓɓiti dammbugal, guuturuuwa no darii ɗon!

O filii faa o maɓɓa dammbugal ngal, ammaa guuturuuwa ngan haarii naati. Nga nanngi Safiya, nga faɗɗi nder mbasu.

Guuturuuwa ngan fa'i gayka muuɗum, inga yima nder welo welo.

Nga ƴami ho'ore magga: "Se nii miɗo tawranoo bagi finaa-tawaa, ɗum woonanno hiraande am sanne. Nyallooma lobbo oye woni oo!"

Ko nyawli seɗɗa, subaka, inna Safiya waddanoyi suka debbo neema no woowirnoo. O yimi jimol makko, ammaa Safiya wurtaaki. O yimitii jimol kaden, faa han Safiya wurtaaki.

Gaɗa ko o yimi ngol tataɓere, o tutii maɓɓirgo ngon. O yi'aay Safiya. Kumpa majjum nanngi o, nden o miiji dow ko yaawi faa o waɗa manyeere.

O waanji bagi nder tummbude mawnde, o roondinde, o fa'i gayɗe ɗen nden o yotti dammbugal guuturuwa, o salmini. Guuturuwa maati henndu bagi finaa-tawaa on, nga maɓɓiti dammbugal ngal dow ko yaawi.

Inna Safiya wi'i: "Jam waali guuturuwa! Mi won miɗo wittoo ko nanu-mi oɗon njima no wooɗiri. Nder wuro gooɗom poonndii-mi faa mi juulowa nyallaande juulɓe suka gooɗom."

Guuturuuwa ngan yiɗaa tawee yaraay bagi finaa-tawaa on! O gansitii inna Safiya nder gayka makko. Inna Safiya wi'i: "Accee mi waanjana on bagi on fadde am hooƴitaade laawol."

Guuturuuwa ngan weltinii sanne, dow gaba go'o, nga yardi ko nga wattanaa.

Inna Safiya yeeƴitii waanjani ngan kaden –kaden o ɓeydani nga- Faa to baa fuy tawaaka nder tummbude nden.

Jooni kay guuturuuwa sulii sanne naako nga ɗaanii e leydi.

Wakkati inna Safiya nanunoo karali guuturuuwa ngan, o maɓɓiti mbasu ngun, Safiya wurtii. Safiya e inniiɗum ndoggi law law kooti wuro.

Nden warde jooni, Safiya e inniiɗum no mbeltini nder wuro heso ngon!