Sa Nana ganajun yanju tia buji shawanin sǝnaji.

Yinnanju buji masamanne adǝa ngǝlaini kitando.

Bujidǝ iɍinju: ingi goroye-a ɍiwulla-a kǝɍi-a.

Bujidǝ bujiya yanjuye curo ngimbedǝa gade.

Katti gǝre fanjayedǝ ngamdu ye kannua ye kau-aye. Curonju kadi-a kǝlanji-a dasaga.

Nanaa ndason yaye sai kǝladowa ani jagǝria.

Yanju wulji: "Adǝ bujinju masammanne tia kǝladowaro yida ciɍiwi."

Nana fero hangalla.

Na baram kǝrǝnnedǝa nojǝna.

Bǝla kakanjuye Gadoridǝ na dǝganadǝa nojǝna.

Sa san leje kiam kaɍimoye kakanjua casai.

Yim laa, Nana sanambu kido.

Gadoriro, bǝla kakanjuyero ciyenniya, jawallan curo kauwayen facciye ledu tiyero. Rijǝna ngai.

Fǝrdu kǝska laayen napce bana gureyen.

Sadǝn tia kǝnǝm ngoje kǝnnasim badiyen.

Ngo kǝnnasimnjudǝ: Kǝla buji masammannen ti bowoda. Kakanju mǝmǝssiaro tiro kiam kaɍimoye curo kop kurayen ci.

Sa Nana kop kiambedǝa cǝmoyidǝ kǝnǝmmin fayen.

Nana hangallayen simnju kaje kǝlanju sapkenniya, kǝla kǝskayen kǝlakaajinjun ngudo jiɍi ɍiwullaa napkada kiro.

Nana ciyenniya ngudodǝ ganadǝ fefedo bakce tiro jawaldǝa fǝleyeyeno.

Ngudodǝa giya.

Nana na jawaldǝ yindiro yaktidǝro kadio.

Ngudo ɍiwulladǝ njango bujiye Nanayedǝa camǝn kolyen.

Nana nguje ngoyenniya, gǝwaktu sinjuye bujidǝ kiro. Kuwa buji yanjuro asuyen.

Sam kidǝnniya baram am fanjaye ingi ngojaidǝa kiro.

Am fanjaye aiya-a bikke-an tia kapkeyera.

Barga kǝnde feronjayero kani duwajane malyera.

Nana kǝla bujinju masammannen napce danju giyiro.