Waɗiino debbo mbi'eteeɗo Faati, imo wuurdunoo e saarooɓe makko hadde wuro Tooroodi.

Nyannde gooɗom, inna Faati lili o, o filowo ndiyam ɓulndu.

O tawi higiraaɓe makko dow laawol. Nder ladde sukkunde, iɓe njaha faa ɓe teenowa. Faati muuyii yahda e maɓɓe.

O wi'i: "Ngam Alla ndoomee kam ley lekki kaareehi! Miɗo haani mi filanowo inna am ndiyam."

Ammaa higiraaɓe makko njiɗaa ndoomude o.

Faati wi'i: "Wooɗi sanne, mi hewtoto on nder ladde nden!"

O doggi o filowi ndiyam ɗam, o waddani inniiko. Nden o yehi nder ladde nden, faa o yi'itowa higiraaɓe makko.

O tokki laawol ceekol gooɗom. Faro fonngo weendu ngo'oto, laabi potorɗi burtortooɗi nokkuuje fuu no tawaa.

"Faro toye ɓe ƴi'uwiri?" imo ƴama ho'ore makko.

O hooƴi laawol ɓurungol yaajude, o yehi, o yehi, ammaa, o yi'itaay higiraaɓe makko.

Tampiri waawi mo, faa o jooɗi ley lekki, o fowti, nden o ɗaanii.

Wakkati Faati finunoo, jemma naatii. Gite oole no ɗelkita nder niɓre. Bu'i no tummbiri mo! Kulal waawi mo faa o heppi haaccude.

O sii'i faa o dogga, ammaa bu'i dafaaɗi ɗin ngatti mo hakkunde.

Buuru ɓurunde mawngu ndun wi'i: "Ta dirdu ɗon. Se a doggii, min nyaamete!"

Faati ᶇaariiɓe: "Ngam Alla accee kam, mi hoota wuro am!"

Ammaa ɗum haɗaay, bu'i ɗin njahri Faati nder suudu muuɗum'en, tawaandu nder ladde nden.

Suudu non tunnundu, heewunde gi'e e buubi ngonu-ɗi no mbommba. O ɗaatinkinii.

Nder niɓre, o nani bu'i ɗin no kaalda. Buuru gooɗom ƴami: "Noye yi'ite ngen? Ndiyam ɗam wawnyii?" "Sirri on fuu gasii," ɗi nootii ndu.

"Miɗo waawa yahri ndu?" "Jaati, jaati! Miɗon ndafaa," Bu'i ɗiya nootii.

Bu'i ɗin ciryii faa mburtina faati nder suudu ndun.

Ammaa buuru ɓurunde mawngu ndun wi'i: "Bu'i ndaree. To njeggitee ɗatol wuro. Buuru fuu haanaa nyaama feere muuɗum. Eɗen kaani gansito ɗen koreeji ɗin fuu, faa ceennden neema meeɗen."

Jom suudu mayru wi'i: "Mi noddan esiraaɓe am." Buuru fotorndu ndun wi'i: "Mi filoyto denɗiraaɓe am." Buuru ɓurundu mawngu ndun wi'i: "Mi jooɗoto ɗoo, min e neema meeɗen."

Buuru ɓurunde mawngu ndun jooɗi dammbugal suudu ndun, nden ɓeetoo ndilliri nokkuuje fuu. Ko ɗum ɓooyoynoo, buuru ɓurundu mawngu ndun fuɗɗi no ᶇoᶇa yeeso yiite ngen.

Saanga muuɗum, o naati imo hara. Saa'a faati non! Ammaa jooni kay hadde buuru ndun, o yawti? Mawngu mayru waɗi ko dammbugal ngal uddi.

Dabare go'oto woodi.

O fitti dow sanne, o ƴaarii buuru ndun, nden o doggi kaaddi kuule ɗe koyɗe makko mbaawi waɗude.

Wakkati bu'i ɗiya ngartunoo, nden ɗi nji'i ko waɗi, ɗi njehi pilaaki makko, iɗi kaaccira nder boronndi e ɓerɗe kalkuɗe.

Ammaa tawii, ɓe ummaaki law.

Nde o yottinoo nder wuro makko, niɗɗo gooɗom annditii mo, o wi'i: "Faati, Faati wartii, Faati wartii."

Abbiiko e inniiko doggi, njaɓɓitii mo; ɓe kuufiri mo juuɗe maɓɓe, ɓe tinnii, iɓe njetta Alla ko hallisi suka maɓɓe, "Faati, Faati, min miijii a maayi!"

Gilla nyannde muuɗum Faati e banndiiraaɓe muuɗum coƴƴitaaki nder labbe nden.