Ndegooɗom niinon, banndiraaɓe rewɓe ɗiɗo inndirteeɓe Halima e Naaye. Sakiraaɓe maɓɓe fuu maayii. Ɓe mbuuraanonaa dow leydi njoorndi gooɗom. Ƴuwoonde toɓataa, nguure ko nyaamee walaa. Mohen fuu se no haajaa neema fuu, say dilla laawol juutungol ko heɓowa neema.

Halima no suka debbo moƴƴuɗo, deƴƴuɗo e jurmotooɗo. Banndiiko debbo Naaye no cehiiɗo mo hettintaako hollitoore fay go'oto. O faalaaka e niɗdo fuu.

Fajiri gooɗom nii, banndiraaɓe rewɓe ɗiɗo ɓen pini say ɓe paami ko ɓe tawraaka fuu neema. Say nde ɓe njihi filowaade neema. Halima e Naaye adi mohen maɓɓe fuu laawol muuɗum feere.

Nder wakkati oon ɗon, debbo nayeejo gooɗom inndirteeɗo Sago buuruɗo to woɗɗaa-ɓe ɗon daa. Imo anndiraa jeddol riskuuji. Ammaa Sago no ceppinɗo, ɓanndu muuɗum fuu no putte.

Naaye fotti e debbo nayeejo oo, noddi mo. "Ɓiyan debbo, jam ngon-ɗaa? Toye ƴi'uwi-ɗaa? Toye njahataa?"

Naaye nootii ƴamɗe makko. Nden debbo nayeejo on wi'i-mo. "Hoorram faa ɓaade am faa mi haalanee noye ngaɗataa." Naaye bonitii e debbo nayeejo on. O wi'i on: "Miɗo suɓii mi maaya dow mi meema putte maaɗa bonɗe ɗee."

Debbo nayeejo on deƴƴi nden wi'i mo Alla woonnu jahaangal.

Naaye jogii na dilla faa o yottowi nokkuure to o anndaa gooɗom. Nokkuure woodunde kaakate, bolle, gilƴi e iri kuukoy fuu. Naaye tampii sanne, jaccii sanne ngam o nyaamaay baa. Nde o jooɗinoo ɗon faa o fowta say tan tagefuwoy koy fuu naati no ŋata-mo.

Halima duu dow laawol muuɗum fotti debbo nayeejo go'oto oon daa. O sehii ko o yi'i Sago, ngam kam woni niɗɗo arano mo fotti gilla o fuɗɗi jahaangal makko. Debbo nayeejo on noddi-mo nden ƴami-mo ƴamɗe go'ote ɗen.

Halima jaɓi, o hoori Sago faa ɓaade muuɗum. Nden debbo nayeejo on wi'i-mo: "A waɗii ko himɓe heewɓe mbaawaay waɗude." O hokki Halima sawru gooɗom nden o wi'i yah hoota wuro, ton o tawowan ko o haaja fuu.

Halima weltini sanne, o yetti debbo nayeejo on, nden o doggiri wuro. O tawowi ɓaade heyre feɗaande pat kam e neema ɗuuɗuɗo. O laatii debbo ɓuruɗo leydi ndin fuu risku.

Ammaa imo woyana rafi banndiiko debbo nden o wi'i, "Mo hettintaako kollitooje fuu nder hunnduko nyiiwa sakitittoo."