Wandiyo fo day no-ya kaŋ se i ga ne Safiya. Kaŋ baabo bu, nga nda ɲaŋo hinne no go ga baafunay. Han fo, Safiya ɲa ne a se am naŋ ngey ma gana ga ye kwaara fo ra ka fanda kwaara zeena.

Safiya si ba nga ma dira ngey kwaara zeena ra. A di ga hẽ kala a farga. ɲaŋo mo si ba nga ma dira ga a naŋ no-din. Zama gorzo yaŋ no go kwaara zeena banda tondey ra. Amma Safiya hẽẽno ba gumo kala ɲaŋo dira ga a naŋ.

Safiya ɲa ne a se nga ga kande a se ŋwaari zaari kulu. A ne a se, da nga ka, "nga ga doonu no, a ma du ga bay kaŋ nga no. A ne a ma si fuwo feeri boro kulu se."

Safiya ay izo! Safiya ay izo! Fatta taray, ka ga ŋwa dambu ne-ya! Fatta taray, ka ga ŋwa dambu ne-ya! Safiya ay izo! Safiya ay izo! Fatta taray, ka ga ŋwa dambu ne-ya! Fatta taray, ka ga ŋwa dambu ne-ya!

A suba, safiya ɲa ka fu ga kande a se ŋwaari. A sintin ga doonu: Safiya ay izo! Fatta taray, ka ga ŋwa dambu ne-ya! Safiya na fuwo feeri, a na nga ŋwaaro ta ga ŋwa.

Ɲaŋo na a di ga kankam nga gande ra. Safiya furo nga fuwo ra ga koy ga kani. Wiiza gorzo fo go ga tugu saabarey banda, a ma Safiya nda nga ɲa sanney kulu.

Waati kaŋ Safiya na danjey wi ga kani, a go ga ma jinde guuso fo kaŋ go ga ɲaŋo doono dumi te fuwo me-ga: Safiya ay izo! Fatta taray, ka ga ŋwa dambu ne-ya! Safiya ne a se: "Sobay ga koy! Ni manci ay ɲa, ni wo gorzo no." Kaŋ gorza ma wo-din, a moso-moso ga ye banda ga ye nga tondey ra.

Cin nda zaari kulu Safiya ɲa ga kande a se ŋwaari. Cin nda zaari kulu mo no gorza ga ka nga mo. Amma waati kulu, Safiya ga gaaray. Zama a go ga faham kaŋ manci nga ɲa jinda no.

Han fo binde, gorza du dabari fo. A ne nga ga nga jinda bare no ga te Safiya ɲa wano dumi. A na danji bambata fo funsu ga tondiize yutto fo catu a ra. Waati kaŋ tondiizo dungu gumo, hala a ciray, a na ka ga gon. "Gulgulgul" tondiize dunga go ga zumbu kaara ra haray.

Gorza sintin ga doonu ga di hala nga jinda hima Safiya ɲa wano dumi. A ma kaani kaŋ a di nga jinda barmay ga te Safiya ɲa wano dumi.

A suba, za nda hinay, gorza koy Safiya kwaara. Kaŋ a to fuwo me ga, a sintin ga doonu: Safiya ay izo! Safiya ay izo! Fatta taray, ka ga ŋwa dambu ne-ya! Fatta taray, ka ga ŋwa dambu ne-ya!

Safiya ma kaani, a miila nga ɲa no. Kaŋ a na fuwo feeri kala a di gorza go ga kay nga jine. A ne nga ma fu-mayo daabu, gorza na a kosaray. A na Safiya di ga daŋ nga foola ra.

Gorza go ga koy nga fuwo do. A ga dira a ga doonu, kaani maayaŋ se. A go ga ne: "Doŋ da ay gonda ba ay cappaalo kayna no, doŋ ay ga ma kaani ga tonton, zama ay hawra boori. Hunkuna wo zaari hanno no."

Zaaro ra, Safiya ɲa ka a do, a kande a se ŋwaari. A na nga doono te. Safiya mana fatta. A ye ga doonu koyne, Safiya mana fatta. Sorro hinzanta ga, a na fu-mayo tutay ga furo, a man di nga izo. A bina sara, a go ga dambara nda hari kaŋ du nga izo. A go laasaabu mate kaŋ nga ga te.

A na cappaalo daŋ gaasu beeri fo ra, a na dake nga boŋo ra, a za ga ne tondey ra. Kaŋ a ka gorza kwaara, a salam a ga. Gorza ma cappaala haw kaana, a na fu-mayo feeri waasi-waasi. Safiya ɲa ne a se: "Mate ni go?" A ye ga ne a se: "Ay go ga bisa no, ay ma ni go ga dooni kaano fo te. Ay go ga bisa no ga koy kwaara fo ra buci beeri fo do."

Gorza mo si ba cappaala din ma bisa nga ga. A ne waybora ma furo nga fuwo ra. Waybora ne a se: "Naŋ ay ma ni no baji kayna hala ay ga bisa." Gorza ma kaani, a na bajo kulu haŋ.

Safiya ɲa go day ga a no bajo, kala gaaso ra wano kulu ban pat! Kaŋ gorzo su gumo, a go ga furu laabo ra.

Waati kaŋ Safiya ɲa ma gorza go ga korro gumo, a na foola feeri kaŋ ra Safiya go. Safiya du ga fatta. Ngey boro hinkaa zuru kala ngey kwaara. Za han din, Safiya ye nga ɲa do kwaara tajo ra. I go ga gey baafunay te ga ma kaani.