Waato, Balaati kwaaraa ra, gonda alboro fo nda nga wande.

I ga ne kurɲo se Donga, wando mo Rumanatu. I gonda ize wayboro iddu.

Waati kaŋ Rumanatu du ize iyyanta gunda, Donga na a hanga candi: "Da ni kande ize-way hino wo, kulu ni ga daray."

Amma da ni kande ize alboro, ay ga burɲe bambata te ni se.

Kaŋ hay-zaŋa to, Rumanatu koy ga di waybora kaŋ ga hayandi.

A na a hã hala ize aru no wala wayboro.

A hay taway yaŋ, alboro fo, wayboro fo. A na waybora ma daŋ Useyna, albora mo Usayni. Da a na Useyna guna, a ga ma kaani.

Amma da a na Usayni guna, bina kulu no ga sara. A go ga miila kaŋ hari folloŋ no cindi nga se nga ma te.

Rumanatu zuru ga dira ga Usayna naŋ waybora kaŋ ga borey hyandi se.

A na ize-aro cabe Donga se nda farhã.

A ma kaani gumo, a na kwaaraa kulu burɲe.

Usayni ka ga beeri ga te alboro hanno.

Usayna mo beeri ga te wandiyo hanno.

Han fo, Usayni go ga nga baaba almaney kuru, kala a di wandiyo hanno fo.

A ne: "Wandiya wo day no ay ga hiiji."

Waati kulu kaŋ a na a hã hiijay se kulu wandiya ga soobay ga hẽ no.

Han kulu kaŋ arwaso na sanno te a se, wandiya ga hẽ day no. Abinde, a koy nga ɲa kaŋ ga ti Rumanatu do.

A ne a se: "Ay di wandiyo hanno fo, ay ga bara hiijay se. Amma waati kaŋ ay salaŋ a se kulu a ga hẽ no."

Maamaaci na a di kaŋ ɲaŋo ne a se: "Hẽẽno din, manti yaamo hẽẽni no, a ga cim, ni wayme no, araŋ wo taway yaŋ no. Ni baaba soofu alboro ga bisa wandiyo. Ay binde, ay na ni wayme furu waybora kaŋ ga borey hayandi do. Nga ga ay kande nin ni baaba do."

Waati kaŋ Usayni na deeda te nga baaba se, a faham kaŋ daray yaŋ te nga se.

A na wando ce, i na care gana ga koy waybora do nga Usayna ta ga kande.

Waati kaŋ Usayna ka nga baaba kwaara, baabo nda kwaaraa dottiijey na hincin fo zeeri ga wi, ga a kaayaŋo bine-farhã cabe.

Alwaati kayna banda, bonkoono ize arzakante fo na Usayna hiiji.

A kande nga hayrayey se lakkal-kanay nda arzaka boobo.