Ndra drio ri si Etoo piki a'a Ewa be tualu. Etoo ni 'ba onduaru azini ba lokiri be tuni 'i. Ewa ni 'ba eyere azini inzitaru ni'i.

O'du alu, Etoo mu cua-a ra je ini jijima ndrizaru 'bani ede aya si 'diyi. Eri ni emviria akua Etoo esu Ewani gerikoa. Ewa ndre jijima Etoo ma pa 'iyi ra azi ni le 'yi tu. Nga 'di zi eri ma tia kini, "ma agi Etoo la, ije mivele jijima ndriz 'diyi nguaya?" Ewa nga di eri zi I'I jizu pari eri ni te i vile jijima jezu ri ma alea.

Etoo nga di 'yo ewa ma tia kini "le mi ma esu jijima dripi mavile di ni ndeni ni 'i. Mini ecozu ngazu mi ecezu 'ba amavile enyatia 'diyi dri beni' azini eyini ani 'yezu misi a'yasi beini." Ayiko fu di Ewan i e'yo Etoo ni 'yo le ri si saaru! Ewa pi nga 'di 'eyo out ngazu drifuzu drusi obitisi Etoo vile akua.

Angu kadi ati bo Ewa nga di mu Etoo vile akua. Etoo a'I eri ra kini, ma agi, mi efi mavu joa 'dole ama di nga mu mini jijima ndriza ru agaapi ra 'ba azini nga sule kuri pee beni.

Ewa osu tu 'eyo Etoo ni 'yole ri si. Nga 'yo "kirikiri si ma agi nga mani ma aza ci fo." Ma ega tea ma 'ye mu mi be cua-a jijima je 'dale. Etoo nga omvi eri ma tia kini, Ewa ma agi la afa minileri jijima ni ya, kani cuu ma adari 'I ya?

Ewa nga di a'a e'yere azini nga 'yo kini "Eh! Ma le mani jijima ni! Adusiku ma awini aje o'duko inisi 'eyo ni ku. Dika ma vini lu 'eyo ega jijima nde ma dria 'I adule." Kadinile Etoo nga di Ewa ma dri cee muzu 'I vile jo ri ma ngukua le ru. Isu de 'dale Etoo edu aci ngiri eja ti ambo ambo 'diyi si bo'. Etoo nga 'di 'yo ewa ma tia kini "mima su mi pa aci si ekandrindri di ma alea mivile jijima odiri ni i'i edezu beni."

Ekile Ewan i jijima ayaru 'dari ma avata avasi ri le, ri di 'eyo 'ye kile Etoo ni 'yole i'ma tia ri le. Okori si Ewa awini aci ma drita tu ri ama i'i ma rua ku ye. Coti Ewa ma pa edodi ve azo azo. Te kiriti jijima ma avasi awini i'i ma pa se kalaa aci ma aliari si aluniku! Aci ka mu Ewa ma pa ve sawa angiri bo, Ewa edo di owu odukosi azoni risi.

Ekile Ewan i jijima ayaru 'dari ma avata avasi ri le, ri di 'eyo 'ye kile Etoo ni 'yole i'ma tia ri le. Okori si Ewa awini aci ma drita tu ri ama i'i ma rua ku ye. Coti Ewa ma pa edodi ve azo azo. Te kiriti jijima ma avasi awini i'i ma pa se kalaa aci ma aliari si aluniku! Aci ka mu Ewa ma pa ve sawa angiri bo, Ewa edo di owu odukosi azoni risi.

Etoo kamu ndre Ewa ni owaria 'bo, nga 'yo eri ma tia kini "ma agi Ewa la, mi asi ma tete azini mi ovu nga ciri 'doo! Mi ka mu awu owuza be drile, mi vile jijima 'diyi nga ovu onzikanyaru ra foo." Ewa ka mu 'eyo 'di eri 'bo do vini i'i were ra te eri ma pa ve pi ri ma azoo ri di mu drile 'dani. Lokiri Etoo vile ri si ka mu mindre nee Ewa ma milea 'bo, ja i'i mati kalaa leru Ewan i guzu azini 'yo eri ma tia kini mi ovu ciri ma agi, mi ma owu ku ika jijima le r aria.

Aci ma okpo Ewa ma vepi ri ka di mu ali eri ma drilesi 'bo, Ewa embu aci ma alea ri si amve. La di 'i nyakua vaa i'i ma pa ma zo taria, "eya wa yee ma pa ni di su do yo!"

Etoo kamu ndree 'dini 'bo, ese 'I Ewa a bi vu ogogo 'eyo 'yozu eri be oyokolo si kini "Ewa ace te lu mi ni were jijima ndriza diyi esu zu, kadile e'yo mini 'ye 'disi mi econi di yi esu alua ni ku."

Mba o'de Ewa ma dria kakau econi pa so 'I si adule ku adisiku eri ma pa ve woro aci si ra azini eca di nzola nzola ru vini ba'rataru indi. Pani ka mu e'do ja bo e'do di aci cikociko ekile bileni ni nga ovule pa nde 'diyi ma rua ciri le.