Hapo zamani za kale paliondokea mvulana mmoja aliyeitwa Demane.

Alikuwa na pacha mwenzake aliyeitwa Demazane.

Wazazi wao walipofariki, Demane na Demazane walienda kuishi na mjomba wao. Huko kwa mjomba wao, walitendewa mabaya.

Walichapwa kwa vibiko virefu, na walipewa uji mwepesi mara moja tu kwa siku. Kwa sababu hiyo, walitoroka.

Hawakuwa na nyumba ya kuishi. Waliona pango wakaamua kuishi humo. Waliogopa kwa sababu walisikia kwamba majitu yaliyowala watu yaliishi karibu.

Kwa hivyo, waliunda mlango wenye nguvu. Wakafunga kiingilio na kuacha mashimo mawili ya kupitisha hewa na mwangaza.

Kisha Demane akamwambia dadake, "Baki humu pangoni nikatafute chakula. Na usipike nyama kamwe. Majitu hupenda sana harufu ya nyama."

Kila jioni Demane alirudi na nyama ya sungura, ndege au paa. Kila aliporudi pangoni aliimba:

Demazane, Demazane,
nimefika kwenye pango,
nifungulie mlango,
ndiye mimi si uongo,
nimewinda na korongo,
tupike kwa kikaango,
ufungue kwa mpango,
asiingie muongo.

Kesho yake alipata ukakamavu, akawasha moto ili kuondoa baridi. Lakini aliwasha moto huo ndani ya pango kwa kuogopa majitu.

Aliufunga mlango kabisa. "Nina hakika hakuna hatari nikichoma nyama kwa moto huu. Chakula cha kuchomwa ni kitamu."

Demane aliporudi nyumbani aliimba:

Demazane, Demazane,
nimefika kwenye pango,
nifungulie mlango,
ndiye mimi si uongo,
nimewinda na korongo,
tupike kwa kikaango,
ufungue kwa mpango,
asiingie muongo.

Demane aliingia na kuiona nyama. Aliuliza, "Uliichomaje nyama bila moto?" "Niliichoma kwenye jua nje ya pango," Demazane alijibu upesi. Demane alikuwa amechoka. Hakuuliza swali tena. Waliendelea kufurahia chakula.

Siku iliyofuata Demazane aliwasha moto akachoma nyama tena. Alpomaliza aliusikia wimbo.

Demazane, Demazane,
nimefika kwenye pango,
nifungulie mlango,
ndiye mimi si uongo,
nimewinda na korongo,
tupike kwa kikaango,
ufungue kwa mpango,
asiingie muongo.

Lakini sauti hiyo haikuwa kama ya kakake. Demazane akajibu, "Hapana, wewe si kakangu. Sauti hiyo si yake."

Baada ya muda mfupi alisikia sauti tena ikiimba:

Demazane, Demazane,
nimefika kwenye pango,
nifungulie mlango,
ndiye mimi si uongo,
nimewinda na korongo,
tupike kwa kikaango,
ufungue kwa mpango,
asiingie muongo.

Sauti hiyo ilifanana na ya kakake. Kwa hivyo aliufungua mlango.

Jitu kubwa lenye nywele mwili mzima lilijaa mlangoni. Likamchukua Demazane haraka.

Hata hivyo, Demazane aliokota jivu la jikoni akabeba. Alipokuwa akibebwa alimimina jivu lile njiani walikopitia.

Demane aliporudi alipata mlango ukiwa wazi na Demazane hakuwa ndani. Aliona jivu lililomwagwa kulekea msituni.

Alifuata jivu hilo mpaka alipoona moto mbali.

Demane aliona jitu lililojaa nywele limeketi karibu na moto. Mfuko mkubwa ulikuwa karibu naye. Alisongea karibu na jitu hilo akijifanya anachechemea kama mtu aliyeumia mguu.

"Tafadhali babu," Demane alisema, "Naomba unisaidie. Nimeumia mguu. Naomba maji ya kunywa."

Jitu likasema, "Ngoja nikuletee maji lakini usiguse mfuko wangu. Jitu lilisema huku likiweka mfuko ule vizuri ndani ya nyumba."

Jitu lile lilipoondoka kwenda mtoni, Demane alikata kamba ya mfuko. Ulifunguka na dadake akatoka.

Demane alibadilisha mfuko huo na mfuko wake uliojaa nyuki. Kisha yeye na dadake wakajificha na kungoja kuona kitakachotokea.

Jitu lilirudi na maji pamoja na watoto wake wawili, msichana na mvulana. Likamwambia msichana, "Kuna mlo mtamu ndani ya mfuko. Nenda ukaulete!"

Msichana alifungua mfuko kuona kilichokuwa ndani. Nyuki walimwuma mkono akalia akisema kwa sauti, "Inauma, inauma."

"Nenda ukamsaidie," Jitu lilimwambia mvulana kwa sauti. Pia mvulana aliumwa akalia kwa uchungu."

"Msinifanye mjinga," jitu lilisema kwa sauti likajitoma ndani ya nyumba. Lilifunga mlango na kufungua ule mfuko.

Nyuki wale walichomoka kwa wingi na kumwuma kichwani, masikioni, na hata kwenye macho. Alishindwa kuona akarukaruka na kulia kwa uchungu mwingi.

Jitu lilikimbia kuelekea kwenye bwawa la maji. Lilichopeka kichwa kwenye matope likakwama huko. Liligeuka na kuwa kisiki cha mti uliokatwa.

Nyuki walijenga mzinga wao kwenye kisiki hicho. Baadaye, Demane na Demazane walifurahia asali tamu kutoka kwenye mzinga huo wa nyuki.