Curo bǝla Kakumayen kǝrgakko, nadǝ ngamdu ye kannua ye koro kǝska kaɍiyia tǝrǝm. Bǝladǝn kam yayero kanima ngǝwu wo. Kasuwudǝman kanti gǝnama koro kalala ye fanǝmbawo. Am ngǝwu nga belon dadajai.

Yim laa yani bowose, "Idi ku kǝrwu arakku kalkal tam. Awo laa niro njiye." Kanadi lawuro awi yikke kiworǝkko. Baɍi kasuwu Maineyero karnin kallo leniye. Leduni burwoye bǝrniro nangaro karwu kǝjiro bune farai leddǝkkǝni.

Wayenniya, na karren katte yani-a yinnani-ayen dagada yange jinne-a kalwu kime-a takkǝna. Wu tǝngǝɍi laa fandǝkki katte, yani dadua ye tinene yeyen-a yinnani gursambayen.

Kardǝ jauro cǝmbǝɍǝna nangao duno yaniyen napkekko. Karwukǝji-a kasǝmba-a casakke awima jawalnin rukkǝni, kǝnǝm ngonsen.

Kawu kasuwu Mainero iseyemaro dunia kausuyen. Ngaworam uɍi kasuwuyedngawǝn, kamu laa argǝm so, ngawuɍi so cǝladi. Fuwu ton kongawa yindi dangaɍinja ladoye sawijai. Sǝgǝri laayen fero gana laa maara ɍiwulla yilyilji mukkonna. Yani rui maara adǝa yekkiya, ro waje mukkoyen gǝrsen.

Dawu kasuwuyen kanti kura laa tadakǝskaye jiɍi jiɍi caladi mbeji. Laanjadǝa nokkǝni. Awi tada kǝska aniye cunja yikke yania kiworǝkko? Ani lelemǝn nasara, toni goiba cǝne wulseyeno. Sǝwardǝkke ani ye nda yekko.

Tadakǝska ani ngaye curon moloma karwuni cǝrawo. Alamanja-a jiɍi -adǝa jauro mangarnǝkkǝna. Nankǝjinjaye jiɍi fanduro makki. Yaniro fal sikkiwe yekko.

Sikkiwunniya jǝkkǝkke mukko yindin mowokke njakkekko. Ngalte tadakǝskaye kǝji adǝgai tambǝkkǝni. Awi gade raakkǝni moloni gǝni wa. Moloni ngǝrǝkke kerǝnniya yani-a bawani-a mayekko nga ndaraman bawo. Gerenin kamuwa laa kombǝter caladidǝa kiworǝkkǝniya tandia carunni yera. Kawa so ngǝssekko.

Moloni ngǝrǝkke kerǝnniya yani-a bawani-a mayekko nga ndaraman bawo. Gerenin kamuwa laa kombǝter caladidǝa kiworǝkkǝniya tandia carunni yera. Kawa so ngǝssekko.

Sa laa kumu laa mukkoyen sǝdane na yalla gadeyero siado. Kam laa dadua, ngisi kuruwua siworo: "Wundu cunǝm tadani?" Yirǝkkiari Idi yekko.

Yallasodǝa kasuwun caladi waro kǝla korǝkki. Nǝmmǝkke, memedu ngǝssekko, waneye nadǝn kam laa yalla ciwu waroa. Sakkudǝn kamu laa ise tada fal kiado. Tada fuwuye ndaljamadǝ wuma yikki karwunin. Gadero fadoro wallǝkkiwawo yikke koro so badiyekko.

Sa kam ngisi kuruwuadǝ bowosenniya, koro so badiyekko. Wua sadǝmbawo yikke ngǝrǝmngekko.

Sa yani-a bawani-a cuni cadai fangeranniya jǝkcagane kantidǝro kasargawo. Idi, Idi cǝne yani bowoseno.

Sa cikke yaniro kǝrdǝgǝkkǝnadǝ, yinnani wuro careyen nia awo laa njoro manjiye. Maara bikkeye ɍiwulla curo ngǝrwunjuyen cuttuluwe seno.