Aabawo khaalekho, yabayo umusaani mutweela, n'umukyelama weewe, nga bali n'umwaana wekhaana mutweela yenyene, isi baalaanga bari Khayanga. Nga Khayanga woolisile kimiiko likhumi kye buukhulu, paapawe ne maayiwe baafwa.

Umulebe ukhali uwe ango abweene ta, isi balaanga bari Rosa, waayila Khayanga khuumenya ni naye. Ne Rosa abe waaloosiwala naabi, baamenya mu butaambi buukali naluundi nga bali bonyene.

Khayaanga waatsya khu n'gani tsa paapawe ni maayiwe, khuubalilila kamasika nga buulamu bweewe ni buli buubi naabi.

Lwabawo lutweela, nga Khayaanga kaatsya khu n'gani tsa paapawe ni maayiwe, Khayanga waabona khaamuka khaamiliwu khaarura akari e tsin'gani iya paapawe ni iya maayiwe.

Khayanga waawulila kumweenya nga kwaamila mu khamuka. Kweemba kuri.

Khayanga, e e Khayanga! Mwaana wase umukanwa! Iwe s'uli wenyene ta, umukanwa! N'uyile khaamuka akha, umukanwa! Khasutatsake buli isi wutsya yoosi, umukanwa! Kane khakhuwosawose!

Khukhwaama abweenewo, Khayanga wakyeendatsaka ni khaamuka buli isi atsya yoosi. Nga buli lweesi aakhaasutsakila, akhebulilatsaka maayiwe ni paapawe, syaamukobosamo kamaani, ni ewulila buulayi.

Lutweela waatsya i meetsi khuutaha kameetsi. Ne n'aaba nga enama mu meetsi waareremukha. Khaamuka kheewe khekuunya khwibaale, khaatikhamwo bisiintsa bitaru. Khayanga waaba mu mutaambo kumukali.

Ne imbolambola waabusanisa bisiintsa bye khaamuka tsana. Waabihaamba muukhono, nga eemba kumweenya ari:.

Paapa ni maayi! Bona khaamuka khaatikhile! Khaamuka kheesi mwaamba! Ise ikhole ndyeena maayi ni papa? Imaambile shiisa, muntsokese she khuubonelakho muri mushiili ni nase!

Uri akangamukha ari, Khayanga waawulila liikono lilifwaana nga lya maawe, nga liloma liri, Mwaana weefwe. Yangala bisiintsa bibiramile aasi. Wiikhe mu meetsi ni nabyo. Bitayile kameetsi umale usiingile bikyele byoowo. Nga waamalile khuusiinga, funyikhilila. Kila Khayanga waaloondelela shiilakilo waakhola nga likono ni lyaloma. Ne naakangamukha, waawulila bisiintsa bye khaamuka bikeenda mu bikalabo byeewe, nga biyuungaka atweela, khukhwikelamo khaamuka luundi.

Aryo waasutatsaka khaamuka buli oosi isi atsya. Ne buli isi aabiratsaka oosi, babaandu beyaanga naluundi nga bereebana nari, "Khaamuka kha saambo shiina khano? Lwekhuuba abe baakhubonatsakakho khaamuka khakhafwaana kharyo ta."

Mu bulamu bweewe bwoosi, Khayanga anyoolatsaka tsikhabi nga tsibirira mu khamuka akho.