

Ntsoaki ke mosetsana wa mengwaga ye lesome yoo a bego a rata go utolla le go leka dilo tše mpsha. Mmagwe o be a mo eletša le go mo lemoša ka mehla gore a hlokomele a se wele dikotsing. Le ga go le bjalo, Ntsoaki o be a sa theeletše.
Ge mmagwe a mo eletša ka dikotsi, yena o be a no bona eke ke metlae. Ka letšatši le lengwe, sekolong sa gabo Ntsoaki go ile gwa rulaganywa leeto la go etela serapa sa diphoofolo. Ntsoaki o ile a thaba kudu gobane ke kgale a kganyoga go ya.
Mesong ya leeto, pele a namela pese, mmagwe o ile a re: “Ntsoaki ngwanaka, hle o hlokomele.” Ntsoaki a re: “Ke tla dira bjalo, mma.” Mmagwe o be a sa iketla, ka gobane o be a tseba gore morwedi wa gagwe o rata go dira dilo a sa nagane.
Dipese tša sekolo di ile tša leba lefelo la diphoofolo kua Pretoria. Ge ba fihla, barutiši ba ile ba kgopela bana gore ba hlokomelane gore go se be le yo a timelago. Barutwana ba ile ba theeletša ka kelohloko gomme ba thoma ka leeto.
Mošomi wa serapa, Morena Mahlo, o ile a amogela bana ka lethabo a re: "Dumelang bana! Ke a le amogela. Lehono ke tla le bontšha diphoofolo tša go fapanafapana le go le ruta ka tšona. Etlang re thome leeto la rena."
Bana ka moka ba ile ba mo latela ka lethabo ge a ba bontšha diphoofolo le go ba hlalosetša ka maphelo a tšona. Bana ba ile ba bona le go ithuta ka diphoofolo tša go swana le dithutlwa, ditšhwene, ditau, ditšhukudu le tše dingwe.
Go diphoofolo ka moka, Ntsoaki o ile a kgahlwa kudu ke phanda gomme a kgopela go sepela le yona gae. Bohle ba sega ge a realo. Morena Mahlo a re ga go kgonege, eupša a tshepiša go mo nea popi ya phanda. Ntsoaki a thaba kudu gomme a leboga.
Ge ba tšwela pele, ba fihla lefelong leo go bego go na le leswao la gore go tsena go thibetšwe. Morena Mahlo o ile a lemoša bana gore lefelo leo le kotsi gomme ba se ke ba tsena. Barutwana ba latela ditaelo tša gagwe gomme ba tšwela pele.
Ba ile ba feleletša ka go bona ditlou, gomme ya ba nako ya dijo tša matena. Ntsoaki o ile a fetša dijo tša gagwe ka pela gomme a hloka seo a ka se dirago. Ge a dutše bjalo, o ile a nagana ka lefelo leo ba laetšwego gore ba se tsene go lona.
Ntsoaki o ile a emelela a dira eke o a bapala gore go se be le yo a lemogago leano la gagwe. Ge a bona gore ga go na yo a mo lebeletšego, a khukhuna a leba lefelong leo le kotsi. O ile a lebala temošo ya Morena Mahlo le ya mmagwe.
Ge a tsena, Ntsoaki o ile a makatšwa ke botse bja lefelo leo. Go be go na le bjang bjo botala, mehlare ye metelele le matšoba a mebalabala. O ile a ipotšiša gore ke ka baka la eng go thwe le kotsi, mola le bonagala le le botse kudu.
Serurubele se ile sa dula nkong ya Ntsoaki a sa itebetše. O ile a leka go se swara, eupša sa fofa. A se kitimiša ka lebelo a goeletša a re: “Ke tlo go swara!” Ka go se ele šedi, ga se a bona mokoti o mogolo wo o bego o le pele ga gagwe.
Phaa! Ntsoaki a wela ka mokoting gomme a gobala leoto. A goeletša: “Joo! Leoto la ka le bohloko! Thušang hle!” O be a goeletša kudu, eupša go be go se na motho kgauswi yo a mo kwago. O ile a dula moo a le noši a sa tsebe gore a dire eng.
Go ile goa feta nako e telele go se na nko e tšwago lemina. Ntsoaki o ile a lla gomme a gopola temošo ya mmagwe. Bagwera ba gagwe ba ile ba lemoga gore ga ba sa mmona, gomme ba a botša barutiši gore o timetše ka morago ga dijo tša matena.
Barutiši ba ile ba tshwenyega gomme ba tsebiša Morena Mahlo. Yena le bašomi ba serapa ba thoma go nyaka Ntsoaki. Barutiši ba iša bana dipeseng gomme ba tsebiša hlogo ya sekolo le motswadi ka taba tše. Mmagwe o ile a tshwenyega kudu ka yena.
Ka morago ga metsotso ye e ka bago ye masomenne, bašomi ba hwetša Ntsoaki ka mokoting gomme ba mo ntšha. O be a hlotša, ka gona ba hlahloba leoto leo pele ba mo iša peseng. Bohle ba imologa ge a hwetšwa. Dipese tša boela morago sekolong.
Ge ba fihla sekolong, batswadi ba be ba šetše ba letile bana ba bona. Mmago Ntsoaki o rile go mmona, a mo gokarela ka lethabo. Ntsoaki o ile a kgopela tshwarelo gomme a tshepiša go theeletša. Mmagwe a re ditiro di tla bontšha phetogo.
Go tloga letšatšing leo, Ntsoaki o ile a fetoga gomme a tlogela lenyatšo. O ile a thoma go theeletša mmagwe, barutiši le batho ba bagolo ge ba mo kgalemela. A lemoga gore go kwa dikeletšo go ka phološa bophelo.

