Orin - Ìkà ò pé
Ẹ má ma ṣé
Ìkà ò pé, ẹ má ma ṣé o
Rere ló pé, ara mi

Ìtàn náà dá lé lórí orogún méjì, ìyálé ṣabiamọ, ìyàwó náà ṣabiamọ. Ọkọ wọn lówó, ó ń tọ́jú àwọn méjèjì, kò sí nǹkan tí wọ́n fẹ́, tí ọkọ wọn kò fi tẹ́ wọn lọ́rùn, ṣùgbọ́n bí ọkọ ṣe ń tẹ́ gbogbo wọn lọ́rùn, inú ìyálé kò dùn si ọmọ ìyàwó mọ̀wé

ju ọmọ òun lọ, kò mọ̀ wí pé, ilé ayé kò rí bẹ́ẹ̀ nítorí pé ohun gbogbo wà lọ́wọ́ Elédùmare.

Bí ènìyàn bá ní sùúrù, ohun tí kò tó ń bọ̀ wá ṣẹ́kù, nítorí pé ìyálé kò ní èrò tó da, gbogbo ọ̀nà ni ó ń wá láti pa ọmọ ìyàwó nítorí pé ọmọ ìyàwó mọ̀wé ju ọmọ t'òun lọ.

Ìyálé kò ní àròjinlẹ̀, bí gbogbo wọn ti jáde ni ìyálé se àsáró, ó se èyí tí ó rẹ̀ dòdò pẹ̀lú epo àti èyí tí ó funfun báláhú, nígbà tí àwọn ọmọ náà ti ilé ìwé dé, ọmọ ìyálé ni ó ṣíwájú, bí

ó ti rí àsáró tí ojú rẹ̀ rẹ̀dòdò, ni ó bá jẹ ẹ́, tí ọmọ ìyáwó sì jẹ èyí tí ó funfun báláhú, nígbà tí àwọn méjèjì jẹun tán ni ọmọ ìyálé bá figbe ta, inú bẹ̀rẹ̀ si ni run-ún, ṣùgbọ́n ọmọ ìyàwó kò sí ní ìtòsí nítorí pé ó wà níbi tí ó ti ń gbá

bọ́ọ̀lù, nígbà tí wọ́n ma fi wọlé, òkú ọmọ ìyálé ni wọ́n bá nítorí wí pé ìyálé ti fi májèlé sínú àsáró náà lérò wí pé ọmọ ìyàwó ni ó máa jẹ ẹ́, nígbà tí

àwọn òbí náà ti ń wọlé bọ̀ ni wọ́n bá ọmọ ìyàwó níbi tí ó ti ń gbá bọ́ọ̀lù, ibẹ̀ ni ará ti fu ú.

Bí ó ti wọlé ni ó fara ta pé, òun ti fi ọwọ́ ara òun ṣe ara òun, pé rere ló pé, ìkà kò pé.