Go be go nale basetsana ba babedi ele bagwera. Ba be ba dula motseng wa Alexandra kua Gauteng.

E be e le Mosima le Tumi. Ba be ba rata diruiwaratwa. Seruowaratwa sa Mosima e be e le katse,mola sa Tumi e le putšane.

Basetsana ba, ba be ba hlokomela diruiwaratwa tša bona ka go di fa dijo,meetse le go di hlapiša.

Ka letšatši le lengwe Tumi o ile a kgopela rakgolo wa gagwe gore a mo hlokomelle putšane ya gagwe,ka ge a e ya dipapading tša sekolo.

Rakgolo o be a tšofetše e fela o be a sa kgona go sepela. Putšane ya tshaba, Rakgolo a sa e bone.

Putšane yela ile ya sepela, ya fihla tseleng kgauswi le sethokgwa. Ya ja dijo tša go ba le polasetiki.

Rakgolo a kgopela batho gore ba mo nyakiše yona. Ka nnete ba ile ba e humana, e fela e be e sa tsoge gabotse.

Tumi o ile a humana e le bjalo a botšiša rakgolo, " go reng putšane yaka e le ka tsela ye?" A realo Tumi.
Rakgolo a fetola: " Ke nagana gore e jele se sengwe seo se sa lokago " gwa realo Rakgolo.

Tumi a tšea putšane a e iša ngakeng ya diphoofolo, gwa humanega gore e jele polasetiki. E fela ngaka ya kgona go e thuša.

Tumi a thoma go sepela le naga ya gabo a ruta bana ba go lekana le yena ka bohlokwa bja go lahlela ditlakala ka thining ya tšona,gore naga e dule e hlwekile.