Igboor Mke mar wan u kwase doo ashe kpishi. Iti na er Dookenger.

Sar ior kpishi u vôson Dookenger, nahan ve lu van shiôr.

Igboor Mke kaha mkem ken kungur ya na ngee.

Ior mba van shiôr kwase cii ve za yar u huran mkem.

Aluer or va shiôr shie u mkem ma nyian yô, a kaa a nan er nan za zôr mkem.

Asôôr ne a zôr mkem sha ishima imiôm je, kpa a na or môm ve wan na ga.

Asôôr a van shie u i zer mkem i bee yô tom ve i lu utsenen mkem. "Iyange m shile teremkem anyom atar cii ve i nam kwase ye."

"Tsen nen mkem man me na or wen môm kwase ye!"

Shie u i tsen mkem i bee kera yô, Igboor Mke a kaa er ve haa mkem ken aba.

Ve haa mkem ken aba ve nyian ashe, shi ve haa hough ahenga kpaa.

Ior mba van shiôr kwase shile Igboor tom zan zan ve vôr. A na wan na kera ga.

Iyange i genegh yô, ior mban cii va zua hen ya na er, "Se kera de u ga, saa u na Dookenger kera se nenge, mba kwase a bunde ve yô ve yem kwagh a bee."

"Man me er a ior mban nena?" A hen ken ishima na. Fese nahan mhen za va un ken ityo.

"Kper hide ve hide heen cii, me ver ve mkem hen gbangi. Or u nan a ya asange a mngbakpa ateratar la, me na nan wan wam Dookenger. "

Kpernan yô, asôôr a Dookenger va zua her cii.

Igboor tile vea wan nan ngor er, "M ver ne mkem hen gbangi heen, or u nan a ya asange a mngbakpa ne ateratar man nan a toor yô, kwase bunde nan!"

A hen je er vea fatyô ga.

Ior wa nongo kpishi u yan mkem.

Or nan nyima ishange mke imiôm kpa nan fatyô nan tamen ga man nan hamber kera! "Sh...sh....sh...i nam mngerem...!"

Kwagh ne za hemen zan zan iyange lu nôngon u been. Ishange mngbakpa imiôm kpa ve lu a bee ga!

Alôm maa pine Igboor er, "U na ian wer or a yaan mkem nan a waan imoo?"

"Een, za hemen," Igboor kaa nahan.

Alôm man gba yan mkem toor wan imo, "Igboor Mke, "sh" Igboor Mkee, "sh" wan wough la, "sh" una hia yô, "sh" or nan va, "sh" sôôr un yô, "sh" u zôrô, "sh" asange, "sh" a mngbakpa, "sh" ateratar, "sh" u na nan, "sh"...."

".......nan a yaan yô, "sh" nan a toor yô, "sh" kwase bunde nan!" Ka ape alôm er ayom man a ya asange a mngbakpa ateratar je la!

Tsô kwagh gande Igboor Mke kôr Dookenger na alôm kwase na yem a min.