Igboor Mke mar wan u kwase doo ashe u nengen kpishi. Iti na er Dookenger.
Sar ior u Dookenger ma a lu kwase ve. Nahan ve lu van shiôr kwase.

Igboor Mke kaha mkem ken kungur ya na ngee.
Ior mba ve lu van shiôr i Dookenger cii ve za yar mkem ma huran.

Alu or nan va shiôr shie u mkem ma nyian yô, a kaa a nan er nan za zôr mkem.
Asôôr ne a zôr mkem sha ishima imôm je kpa a na or môm ve wan na ga.

Asôôr a van shie u i zer mkem i bee yô, tom ve i lu u tsenen mkem.
"Iyange m shile teremkem anyom atar ve i nam kwase ye," kape a ôr a ve je la.
"Tsen nen mkem ga me na or môm wan wam ga!"

Shie u i tsen mkem i bee kera yô, Igboor Mke a kaa er ve haa mkem ken aba. Ior ve haa mkem ken aba ve nyian ashe, shi ve haa hough sha ahenga kpaa.

Ior mba van shiôr kwase shile Igboor tom zan zan ve vôr, kpa lu nan ve kwase ga.
Iyange i genegh yô, ior mban cii va zua hen a na.
"Se kera de u ga, saa u na Dookenger kera se nenge, or u kwase a hemba nan yô nan a yem kwagh a bee."

Igboor Mke hen ken ishima kwagh u una er a ior mban cii lu fan ga.
Fese nahan mhen za va un ken ityo.
"Kper ve hide ve va heen cii, me ver ve gbangi mke."
"Or u nan a ya asange a mngbakpa ateratar la, me na nan wan wam Dookenger."

Kper nan yô, asôôr a Dookenger va zua her cii.
Igboor tile vea wan na ngor er, "M ver ne gbangi mke heen, or u nan ye asange a mngbakpa ne ateratar man nan tôôr yô, kwase bunde nan!"
A fa je er vea fatyô ga.

Ior wa nongo kpishi u yan mkem.
Or nan nyima ishange imiôm nan fatyô u tamen ga tsô nan hamber kera! "sh...sh...sh..... i nam mngerem..!"

Kwagh ne za hemen zanzan iyange lu nôngon u been.
Ishange mngbakpa imiôm kpa ve lu been ga!
Alôm maa pine Igboor er, "u na ian wer or a yaan mkem nan a waan imo oo?"
" Een, za hemen, " Igboor kaa nahan.

Alôm man gba yan mkem toor imo i wan,
"Igboor Mke, "sh" Igboor Mke, "sh"
Wan wou la, "sh" una hia yô, "sh" or nan va, "sh" sôôr un yô, "sh" uzôrô, "sh" asange, "sh" a mngbakpa, "sh" ateratar , "sh" u na nan, "sh...."

"......nan a yaan yô, "sh" nan a toor yô, "sh" kwase bunde nan! "
Ka ape alôm er ayom man a ya asange a mngbakpa ateratar je la!
Tsô kwagh gande Igboor kôr Dookenger na alom kwase na yem a min.