በድሮ ጊዜ አንድ ማሙሽ የሚባል የአስራአምስት አመት ልጅ ነበር ።

ማሙሽ የደከሙና በህመም የሚሰቃዩ ቤተሰቦቹን ለመደገፍ ገና በልጅነቱ ነበር ሊስትሮ ስራ የጀመረው ፣ እናም እየሰራ በሚያገኘው ገንዘብ ቤተሰቦቹን ይረዳል።

ነገር ግን ማሙሽ የሊስትሮ ስራውን ሲሰራ ቆይቶ ወደቤቱ ሲመለስ ፣ ሌቦች በተደጋጋሚ ለፍቶ ያጠራቀማትን ገንዘብ ይወስዱበት ነበር ።

የሰፈሩ ህፃናትም በተደጋጋሚ ከረሜላና ብስኩት እንዲገዛላቸው ያስቸግሩት እና ይመቱት ነበር ።

በዚህም ምክንያት ክፉኛ እያዘነ እና እያለቀሰ ይኖር ነበር ።

ከእለታት አንድ ቀን ግን ማሙሽ የቤተሰቦቹ ችግር ላይ መውደቅና መታመም ፣ ሰላም ስለአሳጣው ቤተሰቡን መርዳትም ስለሚፈልግ በአቅራቢያው ወደሚገኝ ፖሊስ ጣቢያ ይሄድና በተደጋጋሚ የደረሰበትን ችግር ይናገራል ።

ፖሊሶቹም ማሙሽ በነገራቸው መሰረት ሌቦቹን ተከታትለው ይይዟቸዋል ።
ሰፈር እየጠበቁ ከረሜላና ብስኩት ግዛ እያሉ የሚመቱትንም ልጆች የተቸገረን ሰው ፡ መርዳት እንጂ መማታትና ማስቸገር እንደሌለባቸው ፣ እንዲሁም ያላቸውን በማካፈል ፣ ስራ በሚሰራበት ጊዜ ማገዝና በትምህርት መደገፍ መልካም ተግባር መሆኑን ይመክሩዋቸዋል ።

ልጆቹም የፖሊሶቹን ምክር ተቀብለው በትርፍ ጊዜያቸው ማሙሽን በማገዝ ጥሩነትና መተሳሰብ ያለበትን ጓደኝነት ፈጠሩ።