Tlhalošo ya mareo

Ka letšatši le lengwe matšatšing a go fiša a selemo, go be go na le mosetsana wa mmele o mogolo yo a bitšwago Shiela, ngwanabo Neo le mpša ya bona Sibi. Ba be ba rata go bapala ka gare ga di-sprinkles tša meetse gomme ba thabela go dula pankeng ya ka ntle gore ba bogele bjang bjo botala bja mebalabala le matšoba. Ge ba dutše pankeng, Shiela o ile a botšiša ngwanabo Neo; "re ka bapala eng lehono?"

Neo o ile a emelela a nagana.
A re; "Go ka ba bjang ge re ka bapala papadi ya kgwele?"

Shiela o ile a myemyela gomme a nagana gore ke kgopolo ye botse. Ka lethabo, o ile a dumela gomme a botšiša ngwanabo gore papadi ya kgwele e bapalwa bjang.

Neo o hlalošitše gore ba fetišetša kgwele go yo mongwe le yo mongwe gomme ge o e foša, o ema ka gare ga meetse a go gaša go fihlela motho yo mongwe a bala tee, pedi, tharo, nne le hlano.

Ke moka ba thoma go bapala papadi yeo.
Sibi o ile a kitima godimo le fase ge ba fetišetšana kgwele, eupša Shiela o ile a tšwela pele a foša kgwele.

Shiela o ile a thoma go bontšha sefahlego se sa thabago gomme a se sa nyaka go bapala.
Neo, o ile a lebelela kgaetšedi ya gagwe gomme a re; "E be e fo ba papadi, o se ke wa nyama." O be a sa rate go bona kgaetšedi ya gagwe e sa thaba. Ke moka o ile a akanya gore go ka ba bjang ge ba ja aesekhirimi

Shiela o ile a dumela ka go myemyela.
Ba ile ba tšholla aesekhirimi tša bona le ya Sibi, gomme ba ile ba e latswa ka lethabo. Yo mongwe le yo mongwe o ile a bontšha lethabo, ba myemyela gape.