Isiphofu: Umuntu ongaboniko emehlweni.
Umlingo: Into engakajayeleki ethathwa njengembono wamandla kaZimu.

Endaweni ebizwa kobana yiKwaLanga, kwakuhlala umntazana igama lakhe kunguZanny. UZanny bekasiphofu. Bekahlala nogogo wakhe omdala begodu ohlakaniphileko.

UZanny bekanganabo abangani ngombana bebangafuni ukudlala naye. Bekahlala ayedwa begodu angakathabi ngaso soke iskhathi. Ugogo bekatshwenyekile ngaye.

Ngelinye lamalanga, bekahlezi ngaphasi komthunzi womuthi. Wezwa into imkhotha isandla. "Yini lokho?" kubuza uZanny, atjho aphakamisa isandla sakhe msinyana.

"Ngiyiphathele wena mntwanami, ithinte" kutjho ugogo. Wayithinta uZanny, wayizwa inoboya obutjhelelako. "Khuyini gogo?" kubuza uZanny. "Yinja mntwanami" kuphendula ugogo

UZanny wayibhambatha, amehlo wayo bekakhanya nomsila udlaladlala. "Ngizoyibiza ngoRoxy, ngiyathokoza gogo" kutjho uZanny.

Ukusukela lapho, uRoxy noZanny baba bangani abakhulu. Bebadlala boke. URoxy bekaliya uZanny nabakhambako.

Ngobunye ubusuku izulu beliphazima, uZanny wagula khulu. Ugogo wabanevalo, wathandazela umlingo. Kwathi kusesenjalo uRoxy wamuthinta bewalila kancani.

Ngethemba ehlizweni yakhe, ugogo walandela uRoxy ngaphandle ezulwini. Ugogo walandela uRoxy ngaphasi komuthi, bafumana amakhambi engakajayeleki alaphako.

Ugogo wabuthelela amakhambi lawo wabuyela ngendlini wawabilisela uZanny kobana asele.

Ngelanga elilandelako, uZanny wavuka apholile begodu bekakwazi ukudlala noRoxy godu. Ugogo bekathabile bewathokoza noRoxy ngokumsiza.

Ukusukela ngalelo langa, uRoxy wabizwa kobana yinja enomlingo endaweni yaKwaLanga. Waragela phambili ngokudlala noZanny.