Kusekuseni lilanga selikhiphe umkhovu etjeni. Vusi uhleli endlini ngesikhatsi gogo atsanyela libala. "Vusi!" kumemeta gogo. "Yebo gogo", kuvume Vusi aya ngaphandle. "Ngicela ungikhiphele lelikhula, kunini ngisebenta mntfwanami sengidziniwe". Ale Vusi kukhipha likhula.

"Angeke ngikhone gogo, nami ngidziniwe futsi ungitfuma kakhulu ngoba batali bami abekho." Nanguya Vusi agijimela kodlala nebangani bakhe ngasemfuleni.

Sento saVusi simphatse kabi kugogo. Angene endlini gogo, ahlale phansi adle ematsambo engcondvo. "Sengisaba nekumkhuta lomntfwana ngoba utawutsi ngiyamhlukubeta. Imphela bangenta boSibongile ngekuhamba liJozi bangabuyi, mhlawumbe batawubuya ngalelinye lilanga.

Gogo abone kutsi kuncono ekele kubalisa. Sifiso sakhe kutsi babuye batali baVusi , mhlawumbe utawubalalela bona ngoba yena wehlulekile kuligoba lisemanti.

Ngumgcibelo entsambama batali baVusi babuya eJozi. Bagcoke tingubo takalokusho bayabonakala kutsi bantfu labanemali. Vusi bekangakhoni kutibamba ngenjabulo, bekativa ngatsi sikhala sebatali bakhe siyavaleka. "Make, babe, ngate ngajabula kunibona, ningiphatseleni edolobheni?"

"Hawu! Kuyasetjentwa eJozi kute imali yokudlala nekutsenga tintfo letinganamsebenti." kuphendvula babe waVusi. Adzabukise Vusi nakeva imphendvulo yababe wakhe lenganaluvelo.

Liviki lonkhe Vusi atame kutisondzeta ebatalini bakhe, kodvwa bangayingeni indzaba yakhe. Gogo waVusi bekabukela nje yena afuna umtukulu wakhe atibonele kutsi akekho lamtsandza njengaye.

Namuhla Vusi avuke ekuseni bonkhe basalele ente yonkhe imisebenti yasendlini. Utse nakacedza, wentala gogo litiya nemakokisi. Ajabule gogo kubona indlu yakhe ihlobile. "Hawu! Hawu! Hawu! Ngabe ngiyaphupha yini? Ngiyacala kukubona ukhutsele mfanawami"

"Hlala phansi gogo sinatse litiya, ngiyati uyalitsandza." Imphela bahlale bacoce, Vusi acolise ngekudzelela gogo wakhe,nagogo amcolele umtukulu wakhe. Batali baVusi babuyela eJozi bamshiya. Wasala nagogo wakhe Vusi baphilisana kamnanndzi ngenhlonipho nekutsandzana.