Isilwanyana esifuyiwako – silwane esinobungani, esihlalala nabantu besinakekelwa ngibo.
Into enobungozi – yinto engabanga ihlekelele namkha ibange ukulimala.
Inyoka – yisilwane esirhurhuba phasi ehlabathini, asinazo iinyawo begodu side.
Inja – silwanyana esineenyawo ezine, sithanda amathambo, sinobungani begodu sithembekile.
Ukatsu – silwane esincani, sidla inyama nebisi.

Ekadeni endaweni yange Watervaal kwaNtuli kwakuhlala umtwana womsana ibizo lakhe kungu Jabu ahlala noyise, kanye nenja enzima. UJabu khabe aneminyaka emine ubudala aneenhluthu ezifitjhani ezinzima.
Uyise laka Jabu bekayindoda ede enobuso obuhlekisako. Ebekwenza uJabu ahluke kwabanye abentwana bekulithando lakhe leenyoka.

Ubaba kaJabu khabe anenja enzima, ibizo lenja le lingu Spoti. Ekuhlalisaneni kwabo bekukhona umraro. Umraro bekukobana uSpoti uyinja ethanda ukudlala begodu uyeqayeqa.
UJabu bekazizwa angakakhululeki lokha nakaseduze nenja le. Inja le beyithi nayisondela eduze noJabu bese yena uyabaleka.

Ubaba kaJabu watjheja msinya ukungakakhululeki kwendodana yakhe nakunoSpoti eduze, yeke wakhamba wayokufuna ukatsu amfunela uJabu. Ihloso yakhe kwakukubona umtwanakhe athabile. Ukatsu lo beka zotho ngokwebala, igama likakatsu lo bekungu Zothwana.

Ukufika kwakakatsu akhange kumthabise uJabu, wathi ukatsu lo ugcwele amaboya khulu. Ngalokho azange afune ukuzibona adlala nomnganakhe omutjha ongukatsu. Isilwane ebekasi cabanga bekuyi nyoka kwaphela.

Ekugcineni uJabu wabona bona akakhulumisane noyise amutjele iqiniso lokobana yena akafuni inja namkha ukatsu kodwana ufuna inyoka njengesilwane angasifuya ahlale naso. Ubabakhe wamuhlathululela bona inyoka akusiso isilwane esifanele ukufuywa ngekhaya ngombana siyingozi. Wamutjela bona iinlwane ezivunyelwe ukufuywa zizinja, Imiqasa, iinyoni, abokatsu Kanye nezinye.

Ngalokhu akutjelwe ngubabakhe uJabu wafunda bona iinlwane ezivumeleke ukufuywa ngilezi eziletha ukuthaba begodu ziphephile kiwo woke umuntu. Ngesizo laka yise uJabu wabesele acabanga imiqasa, amajuba, izinja kanye nokhunye.