Luhlu lwetinchazelomagama
Tentile: Umlingisi lomcoka
Emtapolwati :lapho kunetincwadzi letingafundvwa
Utfukutsele: Kukwata kakhulu
Unemahloni: kuba nemahloni ngobe wente intfo lembi.

Lilanga belishisa, futsi besibona likhaya lelincane lelinhle laTentile lapho bekahlala khona namake kanye nagogo wakhe. Tentile uyintfombatana lencane lengatitsatsi tibopho tetento tayo. Ngalelinye lilanga wahlangabetana nesimo lesimatima. Loku kutawushintja yini kutiphatsa kwaTentile? Asesibone!

Make waTentile ubita Tentile ekhishini. Tentile uya ekhishini ngenjabulo, tinwele takhe tivulekile. Make waTentile utfukutsele ngoba Tentile akazange avale lifasitelo lasekhishini.

Tentile unemahloni ngekubanjwa, kodvwa kukhona lakucabangako. "Make ngingachaza, gogo bekangiculela ingoma yakhe lenhle yekulala manje ngakhohlwa". Maye! Kubonakala shengatsi Tentile akafuni kuvuma liciniso.

"Tentile, ungayibalekeli imitfwalo yakho; loko akukalungi", kusho gogo wa Tentile. Tentile ucedza kudla kwasekuseni bese uya esikolweni, ashiye make wakhe amangele.

Bo Tentile naSakhile bebadlala enkhundleni yesikolwa. Tentile ngekutigcabha utjela Sakhile kutsi ubaleke njani kunina ekuseni, kodvwa Sakhile akavumelani naloko. Tentile wadvonsa Sakhile kutsi bayodlala umdlalo wekubhaca emtapolwati.

Thishela Mona ucondzisa bafundzi edvute nemtapo wetincwadzi, indzawo lenhle lenemashelufa etincwadzi. Ngekungacondzi kahle, Tentile ugicita inqwaba yetincwadzi. Thishela Mona uyeva kutsi kunemsindvo futsi ukhatsatekile.

Thishela Mona ubona tincwadzi letisakatekile. Sakhile wasondzela watsatsa licala bese wacolisa. Thishela Mona wabonga Sakhile ngekwetsembeka kwakhe. Tentile utiva anelicala kodvwa uyesaba kukhuluma. Abuka ngekuthula njengobe Sakhile nathishela Mona bakhuluma mayelana ngekulungisa emabhuku.

Ngekuhamba kwesikhatsi ebusuku, Tentile uba nenkinga yekulala ngobe utiva anelicala. Gogo wakhe uyambona bese ungena ekamelweni lakhe, ameluleke ngekutsi kwemukela umtfwalo wemfanelo kwenta umuntfu abe ngulohlakaniphile futsi abe ngumngani lokahle. Ngekukhutsatwa ngemavi agogo wakhe, ekugcineni Tentile wenta sincumo.

Ngakusasa ekuseni, Tentile wafika esikolweni atimisele kulungisa tintfo. Eklasini lathishela Mona, Tentile ukhuluma nemfundzisi wakhe ngekutimisela. Loku kumangalisa thishela Mona kubona indlela Tentile latiphatsa ngayo. Tentile uyavuma kutsi wabhidlita tincwadzi, kodvwa livi lakhe belinemfutfo ngisho nobe abetfukile. Thishela Mona walalelisisa, wakhombisa kucondza kanye neluvelo.

Tentile naThishela Mona baya ekhoneni lelisemtapolwati, lapho khona Sakhile amele khona ngekukhatsateka. Ngelusito lwaSakhile, bayatihlela ngekushesha tincwadzi. Tentile utiva akhululeke njengobe basebenta, ati kutsi wente lokulungile. Ngekutetsemba lokusha, Tentile uyatimisela kutsi atsatse umtfwalo wekwenta loko lakwentako, ngisho nobe kungaba matima kangakanani.