Dienywa: Setšweletšwa sa mohlare goba sebjalo se sengwe seo se nago le peu gomme se ka jewa bjalo ka dijo.

Merogo: Dibjalo goba karolo ya dibjalo yeo e šomišwago bjalo ka dijo, go swana le khabetšhe, ditapola, karoti goba nawa.

Sediba: Molete wa meetse wo o bopilwego ka tlhago goba ka mekgwa ya maitirelo.

Kgalekgale, motseng wo o bitšwago gaPhahla, ka thoko ga sediba, go be go dula lapa la batho ba bane : Lethabo le Thabang, mafahla a mengwaga ye šupa, le batswadi ba bona ba lerato, Malose le Pheladi.

Lethabo le Thabang ba be ba rata go bapala ka sedibeng, ba gašana ka meetse a go tonya, ba iphsina kudu.

Lege go le bjalo, papadi ya bona ya meetse e ile ya dira gore sediba se tšhilafale se be le leraga, gomme seo sa baka mathata go badudi ba motse bao ba bego ba ithekgile ka sona go hwetša meetse. Badudi ba motse gantši ba be ba ipotšiša gore ke mang yo a tšhilafatšago meetse.

Ka letšatši le lengwe, ge Lethabo le Thabang ba be ba raloka ka sedibeng, badudi ba babedi ba motse ba ba bona gomme ba goeletša ka bogale, "Hee, lena bana ba ditlaela! Etlang mo!" Thabang, a lemoga kotsi, a goelela a re go Lethabo "tšhaba Lethabo tšhaba!"

Lethabo le Thabang ba kitimela gae ba tšhogile kudu, ba sa tsebe gore badudi ba motse ba šetše ka morago. Ge Malose, tatago bona, a bona badudi ba motse ba batamela, o ile a re "Go bonagala o ka re re na le baeti lehono." a ba dumediša.

Badudi ba motse ba ile ba hlalošetša Malose le Pheladi seo Lethabo le Thabang ba bego ba se dira kua sedibeng. Malose o ile a thibela mafahla ao go ya moo gape gomme go tloga letšatšing leo ba be ba nyamile e bile ba hloka seo ba ka se dirago ka mehla.

Malose le Pheladi ba bona manyami a bana ba bona, ba ile ba tla ka leano. Malose o ile bolela le mafahla a re "Ka ge le rata go bapala ka meetse, ke nyaka go le direla tšhemo ye nnyane moo le ka nošetšago dibjalo letšatši le lengwe le le lengwe".

Lethabo le Thabang ba be ba thabile kudu ka kgopolo yeo. Tatago bona Malose o ile a ba botša gore ba kgethe dienywa goba merogo le ge e le efe yeo ba ka ratago go e bjala. "Ke rata go bjala sepeneše ka gore se na le phepo ebile se tla ntira gore ke tie," a realo Lethabo. "Ke rata go bjala ditamati ka gobane di na le bithamine C ye ntši yeo e thekgago maphelo a masole a mmele le go thuša ka go lwantšha malwetši a go swana le mokomane." a realo Thabang.

Malose a ba direla tšhengwana, gomme ka lethabo ba bjala dienywa le merogo yeo ba e kgethilego ka thušo ya Malose. Le gona o ile a ba kgonthišetša gore ba na le meetse a go nošetša dibjalo tša bona ka mehla.

Tšhengwana ya bona e ile ya fetoga tsela e botse ya gore Lethabo le Thabang ba šomiše meetse. Lethabo le Thabang ba ithutile ka go lema ditšhengwana le bohlokwa bja go bjala dijo tša bona. Ga ba sa bapala ka sedibeng, gomme maloko a setšhaba a ile a imologa.

Lethabo le Thabang ba ile ba ipshina ka dijo tše bose tšeo di dirilwego ka dienywa tša mošomo wa bona, ba tliša lethabo ka lapeng.