Tlhalošo ya mareo
Mohumagadi Moagi-mmago Mogau, Mpho le Lesego
Mogau-mosetsana wa mengwaga e seswai
Mpho-lefahlana la mošemane leo le na lego mengwaga e mene, ngwana waga bo Mogau
Lesego-lefahlana la mosetsana leo le na lego megwaga ye mene, ngwana waga bo Mogau
Ga-Selala-motsana ka gare ga teropo ya Burgersfort
Burgersfort-teropo
Borasetimamollo-batho bao ba rutetšego go tima mollo.
Baagišane-batho bao le agelanego le bona gomme le dula gauswi le bona.

Mesong ya Mokibela lapeng la ga Moagi, ka torotswaneng ya Burgersfort motsaneng wa ga Selala, mohumagadi Moagi o itokišetša go ya mabenkeleng. "Mogau, ke kgauswi le go sepela ke ya mabenkeleng gomme ga ke ye go tše ya sebaka. O šale o hlokometše baratho ba gago.", a realo mohumagadi Moagi go morwedi wa gagwe wa mathomo e lego Mogau.

Mogau o ile a tsoša mafahlana a gabo e lego Mpho le Lesego, gomme ba ile ba tsoga ba hlapa. Ba ile ba ya ka ntle ba ya go raloka gomme ba letile mmago bona. Mpho le Lesego ba ile ba thoma ba llišwa ke tlala. Mogau o lekile go ba botša gore ba kgotlele gomme ka morago ga sebaka Lesego o ile a lla kudu, go fihlela Mogau a šišinya gore ba ye ka khitšhing ba ye ba leke go dira dijo.

Boraro bja bona ba ile ba tsena ka kitšhing, gomme e mongwe le o mongwe o be a fele mošongwana gore o tlo dira eng. Mogau o ile a thoma go fefa ditapole gore ba tle ba dire ditšhipse. Ka morago nyana ga go fetša go dira ditapole, ba ile ba lemoga gore mohlagase ga o gona. Se se ile sa ba nyamiša kudu.

Lesego o ile a tla le maano a gore ba gotše mollo gore ba kgone go apea. Mpho o ile a thuma lepotlelwana la parafini leo le bego le sa thiba gomme parafine ya falala. Ba ile ba gotša mollo owe ka mo ntlong gomme ka ponyo ya leihlo go ile ga tsoga kgabo ya mollo ka mowe kitšhing.

Mogau o ile a bona gore mollo o golela godimo gomme a ntšha bana ba gabo ka mo ntlong.O ile a tšwa a goelela a lebile metseng ya baagišane go ya go nyaka thušo.

Baagišane ba ile ba leletša borasetimamollo gomme ba ile ba fihla ka pela ntle le go senya nako. Ge Mohumagadi Moagi a boa, o ile a bona ntlo ya gagwe e tuka mollo gomme ba tho ba tletše Motseng wa gagwe. Se se ile sa mo tšhoša kudu. "Go direga eng?!", a botšiša a rothiša meokgo.

Bana ba gagwe ba ile ba mo kitimela gomme ba hlalosa seo se diregilego. O ile a ba gokara gomme a ba tšhepiša gore a ke se tsoge a ba tlogela ba le tee gape, gomme o leboga ge go sena yeo a gobetšego.