Tlhalošo ya mareo.

Dijo tša phepo - dijo tša go aga mmele tša go swana le merogo, dinawa le dienywa.

Dijo tša go hloka phepo- dijo tša makhura le malekere.

Makgolo- Koko.

E be e le nako ya selemo motseng wa GaMolepo, go be go dula lesogana ba rego ke Pule. Yena o be a dula le makgolo wa gagwe le baratho ba gabo ba babedi, Mosima le Lesiba. Pule o be a rata go ja dijo tša go hloka phepo. O be a nyama kudu ge makgolo a re " Lehono go jewa bogobe le morogo".

Pule ge a ratile o be a se kgitla sello, lebaka e le gore yena o nyaka go ja dijo tša makhura tša go hloka phepo. Ka le lengwe la matšatši Pule o rile go ja malekere kudu, a ikutlwa a se monate ka maleng. Mala a gagwe a ile a thoma go ba bohloko, gomme le yena a ikwa ke o nyaka go hlatša.

Pule o ile a kitimela go makgolo wa gagwe, a mo tsebiša ka seemo sa gagwe sa mala. Koko ile a tšhoga kudu ge a bona Pule a le mahlokong gomme a ya go mo direla sehlare sa go fodiša mala. Makgolo wa gagwe o rile go mo thuša, a kgopela Pule gore a mo tshepiše gore a ka se tswile a jele malekere le dijo tša makhura.

Makgolo o be a rata ditlogolo tša gagwe kudu, o ile a tsoga mesong a ya mabenkeleng. Makgolo o bone gore Pule o be a se a tsoga gabotse, o rekile dienywa gore a kgone go ba le maatla. Pule, Mosima le Lesiba ba rile ge ba tsoga ba bona makgolo a rwele seroto sa dienywa godimo ga hlogo.

Baratho ba bararo ba ile ba thabela dienywa tšeo makgolo a tlilego le tšona. Ba be ba makaletše mehuta ye mentši ya dienywa tšeo ba bego ba di bona, e be ba sa tlwaela go bona mehuta ye mentši ya dienywa ka nako ye tee. "Makgolo o tloga a re rata kudu, e bile o tlile le mehuta ya dienywa ye mentši" gwa realo ditlogolo tša Makgolo.

Pule o rile go bona gore baratho ba gagwe ba mo kwatetše, a ba tshepiša gore a ka se sa eja dijo tša makhura. Pule o ile a lemoga gore go ja dijo tša makhura le malekere kudu go nale ditlamorago. "Ke a tshepiša ke tlile go ja dijo tša phepo, go tloga lehono" gwa realo Pule a botša Mosima le Lesiba.

Lehono Pule ke lesogana la go tia gobane o ja dijo tša phepho tša go swana le merogo le dienywa. Pule o thabela go ja dienywa le merogo ebile o re di bose kudu.