Umntazana ohlakaniphileko
Ngobile Tholakele Mtsweni
Rob Owen
isiNdebele

Amalegere- Maswidi
ukuthswenyeka- kuzizwa ungakaphatheki kuhle emoyeni.

1

KungoMgqibelo emini, lihlabile ilanga. UNomvula ukhamba nomfowabo uJabu endleleni encani eseduze nendlela ekulu yeenkoloyi. Bakhamba nje bathabile. Bathabele ukuyokuthenga amalegere esitolo.

2

Bakhamba nje babukele neenkoloyi ezidlulako. Kuthi nakudlula i lori ebovu. UNomvula athi "i lori le itjhayelwa ngumakhwelwane wekhaya ubaba uMsiza" UJabu aphendule athi "Angeze sakghona ukumlotjhisa ngombana ukhuluma ngomtato"

3

Ithi ingadlula ilori, uNomvula akhombe ikoloyi ehlaza satjani athi"nangikhulako ngiyokuthenga imodere efana naleya"

4

Skhathi asakhuluma njalo uNomvula. Ilori ebovu kufanele idlulane nekoloyi ehlaza satjani. Ngokuphazima kwelihlo kuzwakale itjhada lithi guu! Iinkoloyi zitjhayisene. UNomvula nomfowabo bathukwe khulu bakakarelane. Bayathoma ukubona ingozi engaka.

5

UNomvula akhumbule bonyana unina wamfundisa bona azi iinomboro zesizo elirhabako ngehloko. Wathatha umaliledinini kamfowabo wadosela inomboro ethi 10177 ekuyinomboro ye-ambulensi bonyana izokusiza abantu abalimeleko.

6

Abantu abasebenza ngama ambulensi nabakhambako bathi ku Nomvula " umntazana ohlakaniphileko usindise amaphilo wabantu namhlanjesi". UJabu athi "nami kusukela namhlanje nami ngizokufunda iinomboro zesizo elirhabako.

7

UNomvula nomfowabo bazizwe basele bangasarhaleli amalegere ngombana bebathswenyeke ngabantu abalimele engozini. Bagcine bajame khona lapho ingozi yenzeke khona balinde bona umama wabo azobathatha.

8
You are free to download, copy, translate or adapt this story and use the illustrations as long as you attribute in the following way:
Umntazana ohlakaniphileko
Author - Ngobile Tholakele Mtsweni
Illustration - Rob Owen, Refilwe Nancy Letswalo
Language - isiNdebele
Level - First paragraphs
© African Storybook Initiative 2024
Creative Commons: Attribution 4.0
Source www.africanstorybook.org
Original source