1. Ukudobha phasi - Kutlhaga
2. Ukudla izambane lakaponde - Kuphila kamnandi ubenayo yoke into. Isibonelo:Ube nemali nokudla okunengi.
3. Iintjhijilo - Miraro ekhona abantu abahlangabezana nayo.

UBrilliant bekahlala endaweni encani ebizwa ngokuthi yiMalahleni. Bekumntwana ovela emndenini odobha phasi kodwana bekahlakaniphile begodu aneemfiso namabhudango amahle ngekusasa lakhe.

UBrilliant bekahlala nonina, uyise kanye nomfowabo omncani. Bekuneentjhijilo ezinengi emndenini wakhe ngombana bebadobha phasi. Kodwana nanyana kunjalo uBrilliant bekahlala azimisele, azifisela nokuhle kodwa.

UBrilliant bekathanda ukuya esikolweni. Bekumntwana othanda begodu ozimisele ukufunda nokuthola ilwazi. Abotitjhere bakhe bebazikhakhazisa ngokuhlakanipha nokuzimisela kwakhe.

Akusiyo yoke into ebeyimkhambela kuhle esikolweni u Brilliant. Kwamanye amalanga bekezwa ngathi umhlaba umjikele ngombana abantwana abavela emindenini edla izambane lakaponde bebamuhlunguphaza.

Bekubuhlungu kuye u Brilliant kodwana akhange abavumele kobana behlise ukuzimisela nesithunzi sakhe. Waziduduza ngokobana azikhumbuze bona esikolweni akakayeli bona kodwana uyele ukufunda.

Amagama abuhlungu egade banande bamutjela wona begodu bamuthuka ngawo amuqinisa u Brilliant. Bekahlala azitjela kobana kuzomusiza ukuthi aqine, angavumeli ukujabulisa laba egade banande bamuhlunguphaza.

Ukuzithemba, ukubekezela kanye nokusebenza ngamandla kwakaBrilliant kwabhadala ekupheleni komnyana. Watlonyeliswa ngonongorwana wokuba mfundi odese phambili ebangeni lakhe iGreyidi 3.

Ukuphumelela kwaka Brilliant kwajabulisa khulu ababelethi kanye nabotitjhere bakhe. Bebazikhakhazisa khulu ngaye ngombana bebazi bona ipumelelo yakhe ivela ekuzimiseleni, ukuzithemba nokubekezela kwakhe.

I yaphela!