Go be go na le mošemane yo mongwe ,leina la gagwe e be e le pongpong. O be a dula le batswadi ba gagwe motseng wa mokwena .Gona mo motseng , go be gona le thaba ye kgolo ya maleboho yeo leruo la mo motseng wo le bego le fula godimo ga yona

Pongpong o be a rata leruo la tatagwe bjale o be a fela a sepela le dinku ,dipudi le dikgomo tša tatagwe go ya go di diša kua thabeng .Gona mo motseng badudi ba gona ba be ba timelelwa ke leruo la bona letšatši ka letšatši.

Badudi ba be ba sa tsebe selo seo se ba Feletšago leruo la bona e fela ba be ba tseba gore go na le phoofolo tsoko yeo e fetšago leruo la bona ka ge ba be ba fela ba hwetša marapo a diphoofolo kua manamelong a thaba ya maleboho.

Pongpong ka letšatši le lengwe ge a le kua thabeng a hlokometše leruo , ke ge pula e tshepiša go na , go se go ye kae ke ge pula e thoma go na gomme leruo la bo pongpong la tšhabela godimo ga thaba gore pula e se ke ya le kolobiša.

Pongpong o ile a gakanega le yena a kitimela godimo ga thaba , mpšanyana ya gagwe yona e ile ya kitimela gae ka lebelo , pongpong ke ge a tšhogile ibile leswiswi le lona le be le šetše le swere ka lebaka la pula yeo ye kgolo .

Kua motseng batswadi ba pongpong ba ile ba makala ge morwa wa bona a sa boye madišong e fela ge ba bona mpšanyana ya gage e boa ele nnoši ba gopola gore morwa wa bona o thibeletše ke pula. Ba ile ba letela go fihlela pula e ema.

Ge pula e eme , ba ile ba latela mpšanyana gore e ba bontšhe mo e tlogetše pongpong gona , ke ge le yona e kitimela kua pele ga bona . Ba ile ba hlaba mokgoši mo motseng go nyaka thušo go badiši gore ga se ba bone pongpong na .

Ge ba fihla thabeng ke ge ba namela thaba ibile ba goeletša ba gopola gore mohlomongwe pongpong o tla kwa mantšu a bona e fela pongpong ga a ka a bonagala , ke ge batho ba nyamile ibile ba bangwe ba gopola go ya motseng .

Mmago pongpong o ile a lla ga bohloko ka ge morwa wa gagwe a be a sa hwetšagale ibile a gopola gore mohlongwe se sengwe se se mpe se mo diragaletše , ke ge batho ba mo kwela bohloko ibile ba thoma go nyaka pongpong ba tiišitše .

Ke moka ke ge ba e kwa modumo wa leruo la bo pongpong , ba ile ba hwetša leruo efela pongpong yena go be go se motho yo a tsebang gore o kae ,ka gobane setšhaba se lebetše mafelo ka moka mo thabeng yeo.

Gona mo thabeng batho baile ba hwetša leswika le lengwe mo go lona gobe gona le leswiswi le legolo banna ba ile ba tsena ka gare ga lewa leo le bego le le gona mo leswikeng leo efela felo fao go be go tšhoša .

Ge ba fihla ka gare ga lewa ba ile ba goeletša ba bitša pongpong ke ge ba bona marapo a diphoofolo tšeo di hwilego. Banna bao ba ile ba lemoga gore dinakong ka moka tše di fitilego leruo la bona le be le felela ka gare ga lewa leo .

Lewa leo e be e le lewa leo le khutilego gona mo godimo ga thaba ya maleboho , ke moka baile ba lemoga gore gona le phoofolo yeo e bego e fetša diphoofolo tša mo motseng ibile ba lemoga gore e dula gona mo leweng leo .

Ke moka banna bao ba ile ba goeletša gape ka mantšu a magolo ke ge pongpong a phapharegago borokong a bonagala a thutše leswika ka hlogo ibile a e tšwa madi. Ba mo hlaganela ba thabile go se go ye kae ke ge ba bona nkwe Mohlareng.

Nkwe yeo ke yona e bego e fetša diphoofolo tša mo motseng bjale yona e ile ya namela mohlare ka ge pongpong a lekile go e bolaya gore e seke ya ja leruo nakong ya ge pula e be e na, bjale ka ge a thutše leswika ya ba sale a eya ka boroko.

Bjale banna bao ba ile ba leletša ba lekgotla taola la diphoofolo gore batle ba sware nkwe yeo , ka lona letšatši leo badudi ba mokwena ba lemogile lewa leo la ka sephiring godimo ga thaba ya maleboho . Baile ba boela gae ba thabile .

Puku ye e ngwadilwe ke moloko April Mabote .
Pukwana ye e ngwaletšwe barutwana bao ba ithutago go Bala e le go ba Ruta go Bala ka leleme la letswele yona pukwana ye e ngwadilwe e le go tšwetšapele projeke ya Gold mind Reading Club.