Kimi biik somoku en emet age.Kichoronook ako kiribee tugul
tuga en olda agenge. Kitun konyo kemeut nekiwo kobar tugwaak. Kiseretyo nia bichoto. Kiit kobwar ichek kiit neyoe si mabar rubeet. Kiiyonchin anyun korutechi Asis.

Kimwaat kele Asis kokimeng'isie en ngw'ony. Asis kokitinye makornotet neo ako chii nekorutechi inendet konyoru borotet. Kiibchechin Asis chi agetugul nekowo oldanyin.Kiinam anyun bichoto somoku bandanywan en karon kotom kochor asista.

Kiin kotakobendi bichoto en rutoinotetnywan konai agenge kole kikautyen beek ak kiyaach inendet koweek. Kitestai oeng'u ak rutoi ak nematyan konyoru boyoon ne kibure en koita nelel. Kiitelelsi boyondonoto murenchoto. Ak kilenji ichek:

" Obaa yonyoru beek chebiriren komatotainan. Kokeny yonyoru ketik chebiregee oker buch. Ak nebo let, ko yonyoru maiwek chekelegee komotainan." Yekin kotar komwachin,kotestai ak bandanywan. Kin kotakobendi konyor beek chebiriren, koker buch.

Yeityo konyor ketik chebiregee koker buch ak kotestai. Ak en let koker maiwek chekikelegee, konyiit buch ak koba. Kiit bichoto kotab Asista ak kikitaach ak ketoroch. Yekin koit sait nekirwe keteben kotkomoche matresisiek kole moche muywek.

Kikikochi icheget matresisiek. Kiin kong'etyo en mutai konyor tuga en sang'.Kimwoch Asis icheget kolenji. "Oket tuga ak oborip." Kiinam akine Kibeles bandanyin.Kinyor ine boyondon ak kimwachi kou choronokchin ak kitestai ak bandanyin.

Kinyor Kibeles beek chebiriren,korus kwong'et."Nechu!" Neityo konyor ketik chebiregee kotelel Kibeles ak konyit. Kiin konyor maiwek chekikelegee kole Kibeles,"tomo ageere cheuchu." Kitestai ak bandanyin ak kikitaach kou alak.

Kimach koru en matresisiek kobaten kikikochi muito. Kikongeet mutai konyor ng'okik chechang." Keet ng'okichun amun melektang'ung' noton."