Neli nako yakakusasana, Simataa ni Limataa banze itukiseza kuya kwamasimu kuyo lita linyunywani zekataza licalano zabona, kono pili basikaya kale baikushuka mi bondataabona babakalimela ni baeleza kuipabalele habali mwanzila.

Bubeli bwabona batateka musipili wakuya kwamasimu, mi neba ikingezi mukeke omutuna walico zeo bakayo ca nako yebali kwamasimu, baikingela cwalo ni mihuma yakuyo tahulisa. Bazamaya katabo

Habali mwanzila kuya, kwashokomoka pombwe yetuna mwamacacani, yabasabisa ni kubahamuha mukeke one bashimbile.

Pombwe yaca lico zabona ni bakubasiya basabile ni kulila. Iyimbotisa mwamukeke wabanana mane yafeza lico kaufela ni kukutela mwamacacani.

Simataa ni Limataa bakuta kwahae banze balila mi bayo taluseza bondatabona sesi ezahezi mwanzila, bondatabona banyema hahulu nikuba bulelela kuli kamuso bashimbe mukeke omutuna ni kubeya mwateni nja yabona.

Sina kamita, pombwe yetuna yalongoka mwamacacani inze imata haibona Simataa ni Limataa bataha mwanzila. Yataba hahulu kubona kuli nakoye baizo shimba mukeke omutuna hahulu kufita wamabani. Pombwe ya fumana kuli kacenu ikakula.

Nako ye, nebasika saba hahulu mi batambeka pombwe mukeke omutuna woo kusina kubilaela sina sapili, pombwe aikutwa kuli banana sebamukuteka kobazo mutiseza lico zeñata cwalo. Bamutambeka kalikute mi niyena a amuhela katabo.

Pombwe a ina fafasi kukala kuimbotise mwamukeke womutuna wo mi asa ukwalula feela kwatula nja mwateni mi yamulumaka kumulobakela mazoho kusiya Simataa ni Limataa inge bashwile kuseha mi pombwe yakuta mwamacacani inge ilila habutuku.