Benue ka kpentar u i ii u iti sha ìfí u Benue yô. Í na un iti i ukwav ér 'Ikysese Kwaghyan'. Ka atamakyon man iyiav tseegh a ngee ken Benue ga.

Íshu ngi shin ìfí u Benue atô kposo kposo. Ijô er Wurukum nahan hingir iorbenue ciu ishu.

Mba yer ishu ne ér, Kusugh. Ka we a kôr kusugh yô, a durau ken wé gighir, aluer ka uvesen je yô, ka a dura or nan pav wegh je kpaa.

Kusugh gberen tsuwe ga, ka a tôô kwa môm pilia man we a ulugh yô kusugh ngun. Kpa u benden ave yô ka ga.

Kôgh ka bo ishu. Ka à wua zege ko je kpaa. Kôgh ka a lian asàà nahan ko una menan un yô man a daghem a man a kuma ko shin ikyer.

Ka a tsuwe kôgh yô a suen ku er, "Uhar-uhar, uhar-uhar, uhar-uhar."

Mba yel ishu ne ér, kpiyô. Ka i á lu kpishi i yila er akpuô. Ka imiôm ken ishu ii hembé lu ican ga u zuan a mi cii.

Ka í lu a apusu iyol, í kember sha tsembelee man i gba eren gbayol a mi ye.

Nyiantsa (ciasegh) ka anshu u kpuee. Ngu a lu fele fe fele shin mnger kpishi.

Ka ior mba fan ikyôr tsembelee ka ve kôr un sha tsuwe u i yer ér mishi la ye.

Gberen tsuwe tum ityogh ga. Nyiantsa ngu ngô vea àbànger.

Chafa ka ishu i pupul. Uter asev ve yila 'captain' ér Chafa. Ka se yila un iti i gen er, Ijebe. Ka ve a lu nôngu yô ka ajebe Apusu na nga a lu cuku. Lun a akuhe kpishi kpaa ga.

Mba zough a na ken u kungwa uagh ga saa ken ífí tseegh.

Ambiuya ka iti i iyongo i hanmô ishu i ì lu a ambi kpishi yô. Ngun ka a lu a ikyuhwe iyol kua ken mugh nyam na kpaa.

Ngu ngô vea mba swemshu man ndiaravande (Ikpyorzwa) nahan.

Liv ka ishu ì lun iyol leghlegh kpishi. Ka vea lu nongo yô i yila er aliv.

Gbem-zwa na u Sha la ka a hemba lihen. Iti iyongo na ér ankarzwa. Ngôôr hôôn kpaa ga.

Liv i tamen ka i uter asev mbatsev yange ve ver sha ciu ngôkem ye.

Atu (Alaji) ka se yila un iti iyongo er azer sha ciu a lyemen iyol kpishi. Ngu inja er ka kôgh nahan kpa iyol na ka i lu pupul.

Aluer atu kuma'u ishiagh yô ka u gba kyundu keng. Megh ku sha asàà na la zua vea iyôato.

Àbànger ka á lu anyi ken zwa a hor shi á ese kpishi. Cie kwagh ga.

Pe ior ve gbe iyol shin mnger kpaa àbànger banen ga. Aluer nomsoor nànà ôô iyol idyelegh yô, àbànger u vesen ka a fatyô u tôndon nan ijua je kpaa.

Ànàm ka a lyemen iyol kpishi. Iti na igen ér Àkèr. Uke mba soon un ga, er ngu a atumba. Ka ve yila un ér Maimama.

Àkèr ka a fatyô u duen kpelan inya yemen ica tugh. Zum u mgerem ma om yô ka a lu shin zwa zanzan iagh i kar pèvèn.

Iyôàto ka anshu u taver kwagh kpishi. Ka vea lu nôngu yô i yila er iyôv mbi àtoov..

Asáá na nga a lu her pe uiaa ve lu la jighjigh. Zum u ishiagh ki iyôàto ka ki a kuma u yô, oo ka u à ta gela gela kpa wuhwe ka u kôrou je u nôngo ku.

Ipyéérégh ngu ngô vea liv kpa un yô kehen ga. Ka ve a lu nôngo yô i yila ve ér mpéérém.

Ka ve lu ijwa hóghloo shi ve wa ahôm kpishi. Ve kpa mba ngôôr hôôn ga.

Anboum ka bo ishu. Iti na igen ér nyéhérégh. Ikyôvogh nagh ki a ishóhó kua megh kpaa. Saa ka i hùa ki kela cii ve i ya ye.

Ikyôvogh nagh civir je mbayev ka ve var gbande a min kpaa. Anboum ka un a nyande yô íshu i í me cii ka i kpe.

Anyi a anboum nga a lu er ka zwa nyon nahan. Kwagh ngu a tsér anboum yo a mol tintin er ka a sùwe bol nahan.

Er kusugh nahan anboum timbir a tsuwe ga. Aluer u mishi fefa ga yô ka à tôndo gbenger tsuwe a undu kor.

Íshu ngee shin ìfí u Benue kpishi. Ingin ka nyinyashu je ne.

Ken hemen yo se lu duen tembe a íshu igen èr Indar, Iyôshu, Hungur, Akua, Íjíko, Ko man Ninga nahan.

Íshu ka i a ngee yô i tumba í an Sha u i de saan ishe ga yô.