Mëëdan Kuoth kɛnɛ Guak kɛ mäth ti di̱t.

Cäŋ kɛl cukɛ wä gör ɣɔ̱ɔ̱k wec mi na̱n kɛ wecdiɛn. Cu Guak Kuoth jiök i̱, "Bi kɔn rɔ gön pi̱."

Cu Kuoth ɛ loc i̱, "Ban pi̱ wä jek nhiam."

Rɛy ja̱liɛn, cu Guak rɛw ɛ näk. Cuɛ Kuoth jiök i̱, "Ci rɛw ɣä näk, göörä pi̱."

Cu Kuoth ɛ jiök i̱, "Ti̱c juaac ɛ tɔ̱, bi pi̱ jek thi̱n." Cu Guak juaac ti̱c, cu pi̱ ben raar kä cukɛ maath.

Mëë cikɛ cop wec ɣɔ̱ɔ̱k, cu kɛn ɣɔ̱k rɛw naŋ kä cu kɛn kɛ yian kɛ dep.

Mëë ci ji̱ ɣɔ̱ɔ̱k kɛ nɛn, cua jɛn riŋdiɛn guɔ̱ɔ̱rkɛ kɛ.

Cu Guak Kuoth jiök i̱, "Ci naath ben, ba kɔn käp."

Cu Kuoth ɛ loc i̱, "/Cu dual."

Mëë ci naath thia̱k, cuɛ Guak moc diɛɛr mi di̱i̱t.

Cuɛ Kuoth nyɔk kɛ jiök i̱, "Ci naath cop." Cu Kuoth ɛ loc i̱, "/Cu diɛɛr."

Mëë ci ji̱ ɣɔ̱ɔ̱k thia̱k kɛ kɛ ɛlɔ̱ŋ, cu Guak yɔal ɛlɔ̱ŋ i̱, "Kuoth! Ba kɔn käp ɛn täämɛ!"

Cu Kuoth wee, "Käp dep yaaŋdu kɛnɛ yiat cio̱kädä min di̱i̱t." Cu Guak kɛ käp.

Cu Kuoth wi̱cdɛ yiath piny kä cu piny rɔ lɛp. Cukɛ coth piny amäni ɣɔ̱k kɛɛl.

Cukɛ bath waaŋ nath kä cukɛ wä päl raar ni dhɔɔriɛn. Cu Guak lät tɔ̱tɔ̱ tit.

Kɛ cäŋ dɔ̱diɛn, cu Guak määthdɛ ni Nyoŋgol jiök i̱, "Määthdä! Ban wä gör ɣɔ̱ɔ̱k."

Cu Nyoŋgol ɛ nhɔk nikä kɛɛl, kä cua jɛn tɛthdiɛn piny lockɛ wi̱c ëëdan.

Cu Nyoŋgol wee, "Ban rɔ gön pi̱." Kä cu Guak ɛ loc i̱, "Ɣey! Ban pi̱ wä jek däärɔ."

Rɛy ja̱liɛn, cu rɛw kɛ näk, kä cukɛ cop guäth ëëdan.

Cu Nyoŋgol Guak jiök i̱, "Ci rɛw ɣä näk."

Cu Guak Nyoŋgol jiök i̱, "Ti̱c juaac ɛ tɔ̱ bi pi̱ jek thi̱n."

Cu Nyoŋgol juaac ti̱c, duŋdɛ ni ɣöö thiɛlɛ pi̱ ti cu ben raar.

Cu Guak rɔ mat ni ti̱cä, kä cuɛ ŋot thiɛlɛ pi̱.

Cukɛ pi̱ wä go̱r guäth mi dɔ̱diɛn.

Mëë cikɛ cop wec ɣɔ̱ɔ̱k, cukɛ ɣɔ̱k da̱ŋ rɛw naŋ. Cukɛ kɛ yian kɛ dep. Mëë ci ji̱ ɣɔ̱ɔ̱k kɛ nɛn, cua jɛn riŋdiɛn kɔɔriɛn.

Cu Nyoŋgol naath nɛn kɔɔriɛn kɛ kɛtni. Cuɛ wee i̱, "Guak! Naath ɛ bëëni."

Cu Guak ɛ loc i̱, "/Cu dual."

Mëë ci naath thia̱k, cu Nyoŋgol diɛɛr ɛlɔ̱ŋ. Cuɛ wee, "Guak! Ci naath thia̱k kɛ kɔn."

Cu Guak wee, "/Cu diɛɛr. Käp dep yaaŋdu kɛnɛ yiatdä min di̱i̱t."

Cu Nyoŋgol kɛ käp.

Cu Guak wi̱cdɛ yiath piny mi bi piny rɔ lɛp bɛ, duŋdɛ ɣöö /kenɛ rɔ lɛp.

Cuɛ yiath piny nikä ti nyin ŋuan. /Ci piny rɔ lɛp.

Cu Guak Nyoŋgol jiök i̱, "Päl yiatdä."

Cuɛ päl kä cua jɛn barɛ kɛ rɔ.

Niɛ wanɔ mɔ, cu ji̱ ɣɔ̱ɔ̱k ben, cua jɛn käp Nyoŋgol, dua̱ckɛ jɛ wi̱i̱dɛ kɛnɛ ŋuäkdɛ.

Nɔmɔ ɛ jɛn jak Nyoŋgol kä thiɛl mi̱em wec kɛnɛ ŋuäkdɛ amäni wa̱lɛ.