Amanyaî nyia Hitojo iko Hidduodduok jio ôbô amiji anna anyia Wîlî-wîlî.

Atî, îttadduhotio nyia Hitojo Hidduodduok motie-motie jio ôbôlô ôhê Hidduodduok buo fê ôttîa.

Buo aciaŋi hunno ômûk êttê isuhotio.

Tô ôbô ôlôŋ, îfî Hitojo Hidduodduok jio, "Ana! ta amanya hôî ꞌdaŋ, iruat iyye ôbô acîaŋ ta aŋettio?"

"Hobeŋ! Atî, eruat nyia nî ôbô etojo." Itarraŋak Hidduodduok buo abaŋ. Ettê Hitojo îdala. "Erraca atî motie!" Arrôsôk Hitojo jio Hidduodduok ta ajôrê.

Alô Hitojo îramana hutto haŋ hosi jio êrracîta isi iko Hidduodduok motie. "Ai, Hitojo! Idehi sôhô Hidduodduok dêê, anyalam," iloliahi hônyê.

Itarraŋak Hitojo jio, "Itayiriete ꞌdaŋ, ojio duo Hidduodduok jio eruat nyia inyi ôbô etojo. Obîsî hûnîa?"

Ayyiyyoro Hidduodduok ahaŋ hosi. Olô îramana hônyê jio inyiak fê Hitojo îttadduhio inyi. Arrôsôk buo fê jihonyi jio ijiara isi êrraca motie.

Anîa, iwwahuni isi ꞌdaŋ jio ijiara isi efuo ilier ꞌdôr-ꞌdôr îhîkôî ônnô ofuoi Hitoji iko Hidduodduok îrracîtarî.

Ta amotie berien, iyyefi haŋ bô Hidduodduok eyyefi abotie. Ettê ifuatan îdîma iŋerit diyya ꞌdôr-ꞌdôr.

Omîjanî isi jio êllê iruatuno Hitojo Hidduodduok, ôllô baka illilloŋo. Attatî isi îmôŋûna jio alla alô illilloŋo, ijiara edduodduok ôbô ôllûhî ihosiere honyi, êttê iruk.

Anîa, ojio nyia motie itterie isi aŋettio tê îrîtî. Tôsô Hitojo îŋîôrôn fîr-fîr-fîr, êttê îgalarû Hidduodduok.

Buo Hidduodduok êttê îjîfana. Ojio gaa teyya, êttê îpal attua mîyaŋ. Alô îdîma diyya.

Ninyia abeŋ Hitojo igonyu Hidduodduok, êttê iwotia. Gaa diyya, illilloŋo jio, "Hidduoodduok!"

Ettê edduodduok ênnê îdîma ꞌtô ihosiere honyi îllûhîna ihiji-îkôî, êttê iruk jio, "Wûôô!"

Attûrûbîaha Hitojo. Ettê ijiaran, "Hêê!" Inyiak fê îŋîôrôn êttê îgalûrû edduodduok êtarrîhî anîa.

Buo edduodduok anîa fê tôsô îllûhîna itua mîyaŋ, êttê îdîma.

Ninyia ayûr êhalû Hitojo, inyiak fê iwotia. Attatî inyiak illilloŋo jio, "Hidduoodduok!"

Buo ôbô edduodduok ôttô hosiere honyi fê ôllûhî ihiji-îkôî, êttê iruk, "Wûôô!"

Ihawwa Hitojo jio amaji alîa, êttê iluluhina jio, "Wululuu!" Ettê inyiak fê îgalûna edduodduok anîa.

Buo anîa fê êttê îllûhîna itua miyaŋ, êttê îdîma.

Aniemuno Hitojo ta aŋêttio êttê iwwotia. Anîa, inyiak fê illilloŋo Hidduodduok buo ayaruta, "Hidduoodduok!"

Buo ôbô edduodduok fê êttê iruk to hosiere honyi, "Wûôô!"

Jio amaji alîa, apulok Hitojo ayyo jio, "Iyaŋ yooi!" Attatî îhûm îŋîôrôn, nyio îlîaha nyia esidi iŋerit.

Ettê fê îgalarû edduodduok anîa jio fîs-fîs.

Ninyia afany Hitojo îgêr icuŋi iŋerit diyya, êttê fê inyiak illilloŋo hobeŋ allaŋ esidi iŋerit.

Tôsô edduodduok ecuŋi iruk tê îgêr honyi jio, "Wûôô!" Ettê iko ꞌdaŋ îrrûhana ahûan esidi iŋerit, êttê îllaŋan.

Ninyia îtayîrûnî aciaŋi hutto miji jio iruat Hidduodduok Hitojo. Ottô namija ꞌdaŋ imuno nyio amîrak nyia isi Hitojo tê êttadduho.

Jio amaji alîa, êttê Hitojo îsîŋarû, buo fê aciaŋi hunno ômûk êttê îsîŋ inyi jio êyaŋûta êttadduho aŋûŋûsîa iko aŋuaî jio aciaŋi hunne îddadduhio inyi iko jio miji ꞌdaŋ.